-
Nga:
Saranda Ramaj
- 26 dhjetor 2022 20:13
- Shpërndaje në:
Mëngjesin e ditës së 79-të, qëkur Kosova kishte mbetur pa ministër të Shëndetësisë, kryeministri Albin Kurti takoi sh-ministrin e këtij dikasteri, Arben Vitia.
Atij ia besoi për të tretën herë, që nga viti 2020, menaxhimin e këtij sektori.
Takimi për të formalizuar këtë emërim nuk ishte i hapur për media. Qeveria e Kosovës ka dërguar vetëm një komunikatë, e cila ka veç një fjali informuese.
“Kryeministri i Republikës së Kosovës, Albin Kurti, sot ka emëruar Arben Vitinë ministër për Shëndetësi, të cilit i ka uruar suksese në plotësimin e detyrave dhe përgjegjësive të tij”, thuhet nga Zyra e Kryeministrit.
KOHA ka provuar ta kontaktojë ministrin e ri, por ishte i paqasshëm.
Ai ishte ministër në Qeverinë Kurti 1. Për disa kohë ishte ministër edhe në Qeverinë Kurti 2, për t’u dorëhequr për shkak të garës për kryetar të Prishtinës, të cilën e humbi më pas.
Prej asaj kohe Vitia nuk ishte pjesë e jetës publike përveç angazhimeve në Degën e Vetëvendosjes në Prishtinë. Ai filloi punën si menaxher në një spital privat nga ku, siç ka mësuar KOHA, ka dhënë dorëheqje të premten e javës që shkoi.
Kur Vitia pati dhënë dorëheqjen nga pozita e ministrit vitin e kaluar, kishte deklaruar që nuk do të kthehej në pozitën e ministrit.
Kthimin e ministrit Vitia në krye të Shëndetësisë e kanë kritikuar partitë opozitare.
Shefi i Grupit parlamentar të PDK-së, Abelard Tahiri, e ka quajtur këtë lajm të mirë për “mafinë e shëndetësisë”.
“Pas afër tre muaj pritjesh për të reflektuar përballë degradimit të shëndetësisë, degradim që u manifestua edhe tragjikisht, kryeministri Kurti paska vendosur që ta rikthejë në krye të shëndetësisë një ish ministër, i cili mbahet mend veç për një gjë: strehimin pas videove me mesazhe durimi, kur pandemia rrezikonte jetën e qytetarëve. Ditë të mira për shëndetësinë siç duket nuk do të ketë edhe për një kohë. A për mafinë e me gjasë ky durim prej tre muajsh ia paska vlejtur”, ka shkruar Tahiri në Facebook.
Ish-ministri i Shëndetësisë e deputet i LDK-së, Armend Zemaj, shpresat për zhvillim në shëndetësi i ka mbështetur tek Zoti.
“Ministri i Shëndetësisë nuk ndryshon. Qasja nuk ndryshon. Ndaj, dështimi e degradimi vazhdojnë. Zoti i ruajtë mjekët e infermierët e mbetur në vend, si dhe pacientët që kanë nevojë për shërim!” – ka shkruar Zemaj.
Vitia deri më tani nuk ka bërë ndonjë deklarim për media.
Ai kishte prezantuar një program për shëndetësi në vitin 2021, për mandatin 4-vjeçar, të cilin pas më shumë se rreth 15 muaj do ta vazhdojë.
Vitia e pason ish-ministrin Rifat Latifi, i cili dha dorëheqje në fillim të tetorit.
Gjatë Qeverisë Kurti 2 shëndetësia është kritikuar si një nga sektorët me pothuajse asnjë rezultat. Kryeministri Kurti në përpjekje për të stabilizuar situatën krijoi në muajin shtator Komitetin Ekzekutiv për Shëndetësi, të cilin e udhëheq vetë ai, por as kjo nuk dha asnjë rezultat.
