Osmani: Partneriteti me SHBA-në jetik, shtyllë për garantimin e stabilitetit afatgjatë

Presidentja e Kosovës, Vjosa Osmani, ka thënë se partneriteti strategjik me Shtetet e Bashkuara të Amerikës është shtylla kryesore për stabilitet afatgjatë në Ballkan. Ajo ka takuar të premten kongresistet Claudia Tenney dhe Chrissy Houlahan, të shoqëruara nga e ngarkuara me punë në ambasadën e SHBA-së në Kosovë, Anu Prattipati dhe delegacionin e Kongresit.

Në takim, përveç situatës aktuale politike dhe të sigurisë në vend, u diskutua për forcimin e partneritetit strategjik ndërmjet Kosovës dhe Shteteve të Bashkuara, me fokus të veçantë në fushën e mbrojtjes, investimeve dhe avancimin e mëtejshëm të marrëdhënieve dypalëshe, njoftoi Presidenca. 

“Presidentja Vjosa Osmani theksoi se partneriteti strategjik me Shtetet e Bashkuara të Amerikës është shtylla kryesore për të garantuar stabilitetin afatgjatë në Ballkanin Perëndimor. Ajo nënvizoi se sa herë që SHBA-ja ka qenë e përfshirë dhe ka luajtur rol aktiv në rajonin tonë, janë arritur zgjidhje të qëndrueshme dhe është shënuar përparim i rëndësishëm”, thuhet në njoftim.

Osmani ka theksuar se angazhimi i trupave amerikane në Kosovë ka qenë themelor për ruajtjen e sigurisë dhe stabilitetit në momentet më të vështira. 

“...bashkëpunimi i ngushtë me Shtetet e Bashkuara është po ashtu jetik për realizimin e synimeve euroatlantike të vendit, që mbeten qëllim i palëkundur për Republikën e Kosovës”, ka thënë Osmani.