Një muaj paraburgim të dyshuarit për krime lufte në Kosovë

Gjykata Themelore në Prishtinë ka caktuar masën e paraburgimit prej një muaji ndaj J. R., të dyshuar për krime lufte në Zubin-Potok. J.R. u arrestua të shtunën mbrëma. 

"Gjykata vlerësoi se caktimi i masës së paraburgimit në këtë çështje penale është masë adekuate, pasi ekziston rrezik real që nëse i pandehuri lihet në liri, mund të arratiset me qëllim të fshehjes dhe ikjes nga përgjegjësia penale, po ashtu i njëjti është edhe shtetas i Serbisë, andaj ekziston rreziku real që të arratiset lehtë dhe të jetë i pa arritshëm për organet e drejtësisë, me çka do të pamundësohet sigurimi i prezencës së tij dhe do të pengohej rrjedha normale e procedurës penale", njofton Gjykata Themelore në Prishtinë.

Javën e kaluar u arrestuan tre persona në Zubin-Potok të dyshuar për krime lufte në Kosovë. Të martën u zbulua një varr masiv në fshatin Kalludër të Zubin-Potokut ndërsa të dielën ministri në detyrë i Brendshëm, Xhelal Sveçla, konfirmoi zbulimin e një varri tjetër masiv në fshatin Jabukë të Zubin-Potokut.