Një i dyshuar tenton të ikë duke kërcyer nga Pallati i Drejtësisë

Një i dyshuar ka tentuar të ikë duke kërcyer nga Pallati i Drejtësisë të mërkurën, pak pasi iu caktua një muaj paraburgim. 

KOHA ka mësuar se personi që ka tentuar të arratisej është një shtetas i huaj, i dyshuar për tentim vjedhje në Prishtinë.

Atij pak para tentimit të ikjes iu caktua një muaj paraburgim nga Gjykata Themelore në Prishtinë. Pas tentimit për të ikur, ai u kap menjëherë nga forcat policore.

Pas kërcimit, i paraburgosuri ka pësuar lëndime trupore. Në Qendrën Klinike Universitare të Kosovës, drejtori i Emergjencës, Naser Syla, ka konfirmuar se të dyshuarit i është përfunduar ekzaminimi dhe se ai është transferuar në Klinikën e Ortopedisë.