Me organizim të Prokurorisë Themelore në Pejë, është mbajtur tryeza me temën “Degradimi i pyjeve dhe ambienti”, ku morën pjesë të gjithë përfaqësuesit e institucioneve përgjegjëse.
Siç bëhet me dije në njoftimin për media, për disa orë është diskutuar për parandalimin e kësaj dukurie negative.
Kryeprokurori i Prokurorisë Themelore të Pejës, Agim Kurmehaj, tha se qëllimi i kësaj tryeze është hartimi i një strategjie të re nga institucionet përgjegjëse për parandalimin e degradimit të ambientit në këtë rajon. Ai tha se duhet krijuar ura ndërlidhëse të komunikimit dhe veprimit nga të gjitha institucionet e obliguara me ligj, për të vepruar ndaj personave apo grupeve që degradojnë ambientin, në veçanti tek pyjet dhe lumenjtë, përcjell Koha.net.
Pos tij folën edhe gjyqtarë, prokurorë, kryetarë të pesë komunave në këtë rajon, komandantë të stacioneve policor, përgjegjës për pylltari dhe miniera, si dhe përfaqësues nga shoqëria civile.
Si rrjedhojë e diskutimeve në këtë tryezë nga të lartcekurit, u arritën disa konkluzione të përbashkëtat të cilat duhet praktikuara në mbrojtje të pyjeve dhe lumenjve.
“Konfiskimi i mjeteve me të cilat është kryer vepra penale; Instalimi i kamerave vëzhguese; Rivlerësimi i licencave për sharrat që gjende në Parkun Kombëtar, dhe rivlerësimi i licencave të seperacioneve të zhavorrit; Shtimi i masave të sigurisë në laura; Rivlerësimi i rezultateve të këtyre konkluzioneve pas gjashtë muajsh në tryezën e radhës”, thuhet në njoftimin për media.