Fondi për të Drejtën Humanitare në Kosovë ka kërkuar që dënimet për kryerësit e krimeve të luftës të jenë më të qarta dhe që për secilin veprim inkriminues të jepet dënimi e pastaj të jetë dënimi i unifikuar.
Duke komentuar rastin e dënimit me 13 vjet burgim të Dushko Arsiqit, FDH-ja ka thënë se në Kosovë po vendoset një praktikë që nuk specifikon veprimet e të pandehurve, por veprimet përgjithësohen.
“Fondi për të Drejtën Humanitare Kosovë konsideron se është duke u vendosur një praktikë që në aktgjykimet për krime lufte nuk specifikohen veprimet konkrete të të pandehurve, por ato përgjithësohen në veprimet e një grupi dhe krijohet bindja se një anëtar i grupit dënohet për veprimet inkriminuese të peronave tjerë. Kjo praktikë duhet ndërprerë dhe duhet arsyetuar secilin veprim inkriminues të të pandehurve dhe të jepet dënimi për secilin prej tyre veç e veç, e pastaj të jepet dënimi i unifikuar. Në këtë mënyrë publiku mund ta ketë shumë më të qartë se për cilat krime dënohet i pandehuri”, thuhet në një reagim të FDH-së.
Arsiqi u dënua nga Gjykata Themelore në Prishtinë me 13 vjet burgim për krime lufte kundër popullatës civile. Sipas gjykatës i pandehuri Dushko Arsiq në bashkëkryerje me pjesëtarë të tjerë të forcave serbe gjatë periudhës janar - qershor 1999 ka marrë pjesë në dëbimin, plaçkitjen, djegien e pronës, keqtrajtimin dhe vrasjen e civilëve shqiptarë në Prishtinë, e me theks të veçantë në keqtrajtim të Artan Krasniqit.
Sipas dëshmisë së Krasniqit, i pandehuri Arshiq ka marrë pjesë në keqtrajtimin fizik dhe psikik të tij më 20 prill të 1999-s në Butovc. Në ato momente dikush nga pjesëtarët e grupit të forcave serbe, pjesë e të cilit ka qenë edhe i pandehuri, kanë shtënë me armë të zjarrit në drejtim të Brahim Shalës i cili ndodhej dhjetëra metra larg të dëmtuarit dhe i cili ishte plagosur dhe më vonë është gjetur i vdekur.
“Përkundër kësaj gjykata e shpalli fajtor të pandehurin edhe për pjesëmarrje në dëbim, plaçkitje, djegie të pronës, keqtrajtim të civilëve dhe vrasje të civilëve të tjerë, duke u thirrur në shumës apo në veprimet të cilat i kanë kryer forcat serbe në rajonin e Prishtinës/Priština gjatë periudhës janar - qershor 1999 e për të cilat veprimet nuk janë administruar provat direkte të cilat mund të ndërlidhen me përgjegjësinë individuale të të pandehurit. Në shpalljen e aktgjykimit, veprimet konkrete inkriminuese të të pandehurit janë përmendur vetëm në lidhje me keqtrajtimin fizik the psikik të të dëmtuarit Artan Krasniqi”, thuhet në reagimin e FDH-së.
Edhe
Dushko Arsiq dënohet me 13 vjet burgim për krimet lufte edhe në rigjykim
Arsiqi qe arrestuar më 8 dhjetor 2021. Më 2 nëntor të 2022-s ishte ngritur aktakuza. Që nga dita e arrestimit i pandehuri Arsiq ndodhet në paraburgim.
Kundër këtij aktgjykimi palët kanë të drejtë ankese në Gjykatën e Apelit.
