-
Nga:
Vlerë Mehmeti
- 12 korrik 2025 20:40
- Shpërndaje në:
Pacientë në QKUK e në spitale rajonale e blejnë vet edhe glukozën, dhe këtë do të vazhdojnë ta bëjnë edhe për të paktën një muaj, pasi SHSKUK-ja tek në korrik arriti t’i nënshkruajë dy kontrata për furnizim. E tri aktivitete të prokurimit, të nisura nga shkurti, nuk arriti t’i finalizojë, pasi në mungesë të ofertave, ato u anuluan
Së paku për edhe një muaj, QKUK-ja dhe disa spitale rajonale do të përballen me mungesë të glukozës, pa të cilën kanë qenë që nga fillimi i vitit.
Bazuar në të dhënat në platformën e prokurimit publik, SHSKUK-ja tek më 1 e 2 korrik i nënshkroi dy kontrata njëvjeçare për furnizim me këtë tretësirë të sheqerit për infuzion, e në to parashihet që porosia e parë të mbërrijë 30 ditë pas lëshimit të urdhërblerjes.
Nëpërmjet kontratës prej 122 mijë e 553 eurosh me kompaninë “Liri Med”, ShSKUK-ja do të furnizohet me 38 mijë e 60 copa glukozë 50% 20-mililitërshe. E me atë prej 108 mijë e 392 eurosh, të nënshkruar me “Dreni Pharm”, janë kontraktuar 157 mijë e 90 glukoza 5% 500ml.
Dy lotet u finalizuan me kontratë katër muaj pas zhvillimit të aktivitetit të prokurimit, më 26 mars, i cili u pat pezulluar shkaku i ankesave të kompanive ndaj lotëve të tjerë të tenderit, e që nuk përfshinë furnizimin me glukozë.
Në SHSKUK dhanë sqarim për këtë pezullim.
“Autoriteti Kontraktues SHSKUK ka pranuar dy ankesa të ndryshme për ketë aktivitet, njëra me datë 19.03.2025 dhe vendimi nga OSHP-ja është lëshuar më datë 05.05.2025. Ndërsa ankesa tjetër, më datë 19.05.2025, dhe vendimi i OSHP-së është lëshuar me datë 29.05.2025. Para hapjes së ofertave, platforma e-prokurimi nuk e mundëson të bëhet hapja e ofertave ndaras. Në momentin e ankesës pezullohet i tërë aktiviteti i prokurimit”, thuhet në përgjigjen e SHSKUK-së.
KOHA javën e shkuar raportoi se pacientët detyrohen të blejnë glukozë në mungesë të tij në barnatoren qendrore të QKUK-së. E furnizimin e paqëndrueshëm me këtë produkt e konfirmuan edhe në Spitalin e Pejës.
“Sol Glukoze 5 % 500 ml. nuk ka pasur furnizime sivjet. Sol Glukoze 5 % 100 ml. furnizim nga LE është bërë më 04.02.2025 në sasi 2600 copë (TM1). Kemi pasur deri më 22.04.2025”, thuhet në përgjigjen e këtij spitali.
SHSKUK-ja nuk arriti të sigurojë furnizim të qëndrueshëm me glukozë, ani se nga shkurti e deri në qershor inicioi gjashtë procedura tenderimi, dy prej të cilave i finalizoi me kontratë.
Nga 25 deri më 28 shkurt, autoriteti kontraktues zhvilloi katër procedura të ndara prokurimi për furnizim me 322 mijë e 44 copë glukozë, dozash të ndryshme. Dy dështuan në mungesës të ofertave nga operatorët ekonomikë.
Nëpërmjet ritenderimit, SHSKUK-ja më 21 mars siguroi 12 mijë e 820 njësi të glukozës 5% të 500 ml, që është sasi e mjaftueshme për dy muaj, me anë të kontratës prej 9 mijë e 900 eurosh me “Exclusive Corporation”.
Përpjekje për blerje të glukozës, SHSKUK-ja bëri edhe në qershor. Procedura e hapur më 2 qershor u anulua në mungesë të ofertave e ajo e 26 qershorit është në fazë fillestare.
