Edhe kryetari i Lidhjes Demokratike të Kosovës, Lumir Abdixhiku e ka refuzuar ftesën e ushtrueses së detyrës së presidentes, Albulena Haxhiu.
Në një përgjigje për KOHËN, nga LDK-ja kanë thënë se nuk marrin pjesë në takim, pasi konsiderojnë se Haxhiu është vetëm një nga deputetët e Kuvendit të Kosovës.
Tutje janë shprehur të hapur të takohen me kryeministrin në detyrë, Albin Kurti.
“LDK, nuk merr pjesë në takimin e thirrur nga zonja Haxhiu, pasi që konsiderojmë se ajo është vetëm një nga deputetet e Kuvendit të Kosovës. Ne jemi të hapur të bisedojmë me kryetarin e LVV-së, z. Albin Kurti, që sa më shpejt ta zhbllokojmë situatën politike në vend, duke i ofruar Kosovës, President”, thuhet në përgjigjen e LDK-së.
Ftesën për takim e kanë refuzuar edhe Partia Demokratike e Kosovës dhe Aleanca.
Edhe
Haxhiu shpreh keqardhje që PDK-ja e AAK-ja refuzuan ftesat për takim: Vendimi i gabuar dhe i pamatur
Haxhiu kishte ftuar liderët e partive politike ose përfaqësuesit e tyre për një takim të përbashkët të martën në ora 9:00.
Takimi, sipas thirrjes së Haxhiut, është konsultativ dhe mbahet në lidhje me zhvillimet aktuale politike e institucionale dhe për rëndësinë e arritjes së marrëveshjes për presidentin konsensual, e edhe për formimin e institucioneve të tjera.
E nga PDK-ja kanë thënë se çështja e zgjedhjes së presidentit mund të trajtohet vetëm pasi të funksionalizohet Kuvendi.
Deputeti i kësaj partie, Arian Tahiri, ka kundërshtuar rolin e Haxhiut në organizimin e takimit me partitë, duke thënë se ajo aktualisht është deputete.
Të njëjtin qëndrim e ka shprehur edhe në Aleancë, e cila që nga fillimi ka refuzuar të shkojë në takimet e thirrura edhe nga kreu i Vetëvendosjes.
Edhe
PDK-ja dhe Aleanca e refuzojnë takimin e ftuar nga Haxhiu
Shefi i Grupit Parlamentar të Aleancës, Besnik Tahiri, ka thënë se partitë opozitare nuk duhet të fajësohen për refuzimin e takimit, pasi sipas tij, kërkesa e tyre është e qartë: funksionalizimi i Kuvendit.
Në një postim të dielën në Facebook, lidhur me refuzimin e PDK-së dhe Aleancës, Haxhiu ka thënë se vendimi i të dy partive është i gabuar.
Ka shkruar se qytetarët e Kosovës po flasin vazhdimisht qartë përmes zgjedhjeve, ndërsa është detyrë e udhëheqësve të partive të zbatojnë në praktikë vullnetin e qytetarëve.
“Më lejoni të shpreh keqardhjen time të plotë që pavarësisht ftesës sime të sinqertë, subjektet politike si PDK-ja dhe Aleanca refuzuan të njëjtën. Këtë refuzim e konsideroj veprim të gabuar, të pamatur dhe mbi të gjitha mungesë të vullnetit për të tejkaluar pozicionimet barrikaduese. Të tilla pozicione nuk e ndihmojnë askënd, aq më pak Republikën tonë. Qytetarët e vendit vazhdimisht janë duke folur qartë përmes zgjedhjeve, ndërkaq është detyrë e jona si përfaqësues të tyre e si udhëheqës partish e institucionesh politike ta zbatojmë atë në praktikë. Kosova ka nevojë për shumë punë. Zgjedhjet do të duhej të ishin opsioni i fundit nëse jo fare opsion. Mbetem me shpresën që deri të martën të kemi reflektim e takimi të jetë sa më i dobishëm drejt gjetjes së një zgjidhje”, ka shkruar Haxhiu në Facebook.
Edhe
Haxhiu fton në takim liderët e partive
E kryesuesi i seancës konstituive, deputeti i Vetëvendosjes, Avni Dehari, nuk i është bindur thirrjes së subjekteve politike oponente që ta vazhdojë seancën për konstituimin e legjislaturës së njëmbëdhjetë.
Në vijë me qëndrimin e kryeministrit në detyrë, Albin Kurti, ai ka thënë të shtunën se fillimisht duhet të arrihet marrëveshja për presidentin, e pastaj do t’i dërgojë ftesat për vazhdimin e seancës.
