Ekspert i sigurisë dhe kriminalistikës, Arben Dashevci, ka vlerësuar se tash e një kohë siguria e ka mposhtur pasigurinë në veri të Kosovës.
Duke folur për reduktimin e pranisë së KFOR-it në Kosovë dhe në urën e Ibrit në Mitrovicë, Dashevci ka thënë në “Interaktiv” të KTV-së se ky është veprim i natyrshëm për shkak të relaksimit të situatës në këtë zonë.
“Ka vite, që matanë lumit Ibër, pasigurinë e ka mposhtur siguria. S’i kemi incidentet që i kemi pasur. Ata që kanë bërë incidente, që kanë kryer sulmin më të rëndë të pasluftës në Banjskë e Ibër-Lepenc, ata nuk gjenden më në Republikën e Kosovës. Tash është vendim i natyrshëm dhe graduali. Dhe reaguesi i tretë, KFOR-i e ka parë të arsyeshme për dislokimin e trupave për vende dhe hapësira të tjera për të kaluar bartjen e përgjegjësisë gradualisht...”, ka thënë ai.
Dashevci ka thënë se pret që edhe policia të mos qëndrojë gjatë mbi urë, por që “simbolika e ndarjes” të mbetet vetëm në histori.
“Kur e konstaton reaguesi i tretë, KFOR-i, që është për paqe për të gjithë, gjithçka tejkalon zhurmat politike që vijnë nga shteti që sillet me qasje destruktive, që çdo gjë pozitive në Republikën e Kosovës përpiqet ta shndërrojë në negative me luftë asimetrike hibride, pa mëshirshëm, propagandë e viktimizim, por faktet e patjetërsueshme e tregojnë krejt të kundërtën. Nuk ka incidente ndëretnike, ka relaksim të situatës, ka pozitivitet”, ka thënë ai kur është pyetur për reagimet kundërshtuese të Serbisë lidhur me vendimin e KFOR-it.
Edhe
Dashevci: Stërvitjet ushtarake provokim ndaj paqes, Serbia do të na sulmonte po të kishte mundësi
Ai ka thënë se nuk mund të ketë asgjë as nga letra e presidentit të Serbisë, Aleksandar Vuçiq, drejtuar shefit të NATO-s e as nga kërcënimi i tij për ndryshimin e rrjedhës së lumit Ibër.
Më 10 gusht, Misioni i NATO-s në Kosovë, KFOR, ka bërë të ditur se e ka filluar tranzicionin gradual të pranisë së përhershme në urën e Ibrit në Mitrovicë. Siç ka njoftuar KFOR-i, kjo po zhvillohet me përmirësimin e situatës së sigurisë në Kosovë, si pjesë e procesit të zvogëlimit gradual të pranisë së KFOR-it.
