Abdixhiku zotohet ta përfundojë në kohë rekorde magjistralen Prishtinë-Podujevë

Në tubimin që mbajti në Podujevë, kandidati i Lidhjes Demokratike për kryeministër, Lumir Abdixhiku, krahas magjistrales që lidh këtë qytet me Prishtinën u zotua se do të ndërtojë edhe zonë ekonomike për bizneset e Llapit, çerdhe të reja e spital. Mbështetja e Llapit, sipas tij, është tregues i fitores së sigurt të LDK-së

Tubimi elektoral në Podujevë, për kandidatin e LDK-së për kryeministër, Lumir Abdixhiku, është tregues për fitore të sigurt në zgjedhjet e 9 shkurtit. Këtë ai e tha tek iu drejtua mbështetësve të partisë të mbledhur në sheshin e këtij qyteti.

“Llap, i dashuri Llap, e paskeni mbushur një shesh të tërë, nuk paska nevojë të marrim fotografi nga tubimi në Gjilan. Kur ju shoh kaq shumë e kam krejt të qartë se po shkojmë veç për fitore dhe asgjë më pak se kaq”, u shpreh ai në hapje të fjalimit.

Abdixhiku u shpreh se ashtu siç e ka përcaktuar rënien e LDK-së, Llapi do ta përcaktojë edhe ngritjen e saj.

“Rënia ndodhi kur ne u ndamë në Llap, ringritja jonë do të ndodhë kur ne ringritemi kështu, si sot në Llap. Kohë më parë mu në Llap, ndarësit e popullit, përçarësit e vendit, shpërndarësit e urrejtjes, kishin kërkuar mbytjen e LDK-së. E kishin kërkuar mu këtu në Llap. Si nuk e dinin këta të shkretë se LDK-ja ka lindur në Llap, LDK-ja është mbrojtur në Llap, LDK-ja do të rikthehet në Llap”, u shpreh ai.

E kthimi i LDK-së në këtë bastion që e mbajti deri në zgjedhjet e kaluara lokale, Abdixhiku tha se do të jetë fitimprurës për qytetarët. U shpreh se Llapi do të jetë prioritet i udhëheqjes qendrore të LDK-së.

Edhe Zgjedhjet 2025 25 dhj 2025 Abdixhiku premton 1.5 miliardë euro investime për Prishtinën

“Është koha të flasim për bërjen e projekteve në vend, të flasim për investime të mëdha që priten të vijnë në Llap e në Podujevë. Do të keni mbështetjen time, do të keni mbështetjen e qeverisë sime. Të gjithë ekipit tim me prioritet absolut Llap”, ka thënë ai.

Në këtë qytet, kandidati për kryeministër u zotua se punimet rreth njëdekadëshe për magjistralen Prishtinë- Podujevë do t’i përfundojë në kohë rekorde.

“Do ta përfundojmë magjistralen e stërzgjatur në kohë rekorde e me prioritet absolut si interes nacional të vendit. Do të jem vetë në terren çdo ditë, çdo natë për t’i përfunduar punimet në kohë rekorde për ju Llap”, u zotua ai.

Abdixhiku premtoi ndihmë për bizneset e tha se Llapi do të bëhet edhe me zonë ekonomike.

“Do të japim mbështetjen e plotë që bizneset e shumta të Llapit e kësaj ane të kenë zonën e tyre ekonomike me qëllim të krijimit të bereqetit të punës e vendit të punës për qytetarët tuaj, për Llapin tuaj”, shtoi ai.

Dha zotime edhe për ndërtimin e çerdheve të reja.

Edhe Zgjedhjet 2025 24 dhj 2025 Abdixhiku: Përfundimi i autostradës së Gjilanit, prioritet absolut

“Do të ndërtojmë çerdhe gjithandej nëpër llap, që fëmijët tuaj të jenë në sistem shkollor nga mosha 3-vjeçare sa më parë e sa më shpejt”, premtoi ai.

Nën qeverisjen e tij, pretenduesi për kryeministër u shpreh se Podujeva do të bëhet edhe me spital.

“Do të rikthejmë spitalin e Podujevës, atë që e hoqën këta, sepse si vend, si qytet e meritoni këtë spital”, premtoi ai.

Abdixhiku tha se pas qeverisjes aktuale 4-vjeçare, që e cilësoi kohë të humbur për Kosovën e ngecje, tha se është koha e kthimit të LDK-së në Ekzekutiv.

“Për katër vjet të plota njerëzit e Kosovës kanë vëzhguar sesi premtimet e mëdha kthehen në fjalë të thata, se si ato e humbasin peshën para humbjes së vetë shpresës. Dhe me shpresë e me besë, humbet dhe ëndrra për vende të punës, për paga të larta, për shkolla të denja, për spitale të shëndosha, për drejtësinë e mbarë, për vetë jetën këtu në Kosovë. Për 4 vjet të plota pamë e dëgjuam pushtetin teksa flet, foli qartë, foli mbrapshtë, foli me çmime të larta, me paga të ulëta, foli me propagandë, me ndarje e përçarë. Është koha të flasim ne, të flasim fort, të flasim djathtë”, tha ai.

Zgjedhjet e 9 shkurtit Abdixhiku tha se do të jenë përcaktim i së ardhmes së Kosovës. U shpreh se qytetarët para vetës kanë dy zgjidhje.

Edhe Zgjedhjet 2025 23 dhj 2025 Abdixhiku premton strategji për “Trepçën” dhe modernizim të saj

“Si një shtet në zhvillim me njerëz që bëjnë jetën këtu, si një shtet të hapur në lumin e madh të rrjedhave botërore, apo si një vend i zymtë i propagandës, i përçarjes, i mbylljes e i sanksioneve, si një vend i zbrazjes së dhimbshme, i thyerjes së madhe përtej së cilës mbesim edhe pak, edhe vetë, edhe keq. Këtë zgjedhje ne e kemi shumë të qartë. Këtë zgjedhje sonte Podujeva e paska shumë të qartë”, deklaroi ai.

Simpatizantëve që dolën në sheshin e Podujevës, përveç votës për LDK-në, Abdixhiku u kërkoi edhe pjesëmarrje në tubimin përmbyllës që do ta mbajë të shtunën në Prishtinë, i cili tha se do të jetë më madhështori i mbajtur ndonjëherë.