Gazetari i KOHËS, Ardit Kika, ka sjell pamje nga vendi ku serbët i mbyllën tendat e hapura gjatë ditës.
15:16 - Lista Serbe thirrje protestuesve në Zveçan të shpërndahen rreth orës 16:00
Lista Serbe u ka bërë thirrje protestuesve në Zveçan të shpërndahen rreth orës 16:00 dhe të mblidhen sërish nesër.
Gazetarja e Kohës, Saranda Ramaj e cila po qëndron në Zveçan ka thënë se këtë thirrje e ka bërë Sërgjan Millosavleviq, nga partia më e madhe e serbëve të Kosovës, Lista Serbe.
Ai ka thënë se protestat e serbëve do të vazhdojnë deri në përmbushjen e kërkesave, përkatësisht tërheqja e njësiteve speciale të Policisë së Kosovës nga komunat në veri, ashtu si edhe kryetarëve shqiptarë.
Lista Serbe ka kërkuar më herët që të lirohen edhe protestuesit e arrestuar një ditë më parë gjatë një përplasjeje me ushtarët e KFOR-it.
15:04 - NATO-ja dislokon forca shtesë në Kosovë
Si përgjigje ndaj trazirave të fundit në veri të Kosovës, dhe lëndimit të 30 pjesëtarëve të misionit të NATO-s në Kosovë (KFOR), në atë pjesë, aleanca veri-atlantike ka marrë vendim për angazhim të Forcës Operacionale Rezervë për Ballkanin Perëndimor, e cila ka qenë në gjendje gatishmërie për angazhim.
NATO-ja e ka bërë të ditur këtë vendim, përmes një postimi në Twitter.
Pjesëtarë të KFOR-it janë përleshur të hënën, 29 maj, me protestuesit serbë në Zveçan, të cilët kanë kundërshtuar hyrjen e kryetarit të ri shqiptar në ndërtesën komunale.
Sipas NATO-s, vendimi për shtim të numrit të forcave është marrë, ashtu që KFOR-I të mund të garantojë sigurinë, në përputhje me mandatin që ka.
Admirali Stuart B. Munsch, komandant i NATO-s për forcat në Napoli, i ka përgëzuar ushtarët e KFOR-it për reagimin e shpejtë dhe të përmbajtur, për të parandaluar trazirat dhe për të shpëtuar jetë.
“Dhuna duhet të ndalet, dhe të gjitha palët duhet të shmangin veprime që minojnë paqen në Kosovë”, ka thënë Munsch.
14:48 - Protestuesit në Leposaviq: Do të qëndrojmë këtu deri në plotësimin e kërkesave tona
Ish-kryetari i Leposaviqit, Zoran Todiq, ka thënë se ende nuk kanë arritur marrëveshje me forcat e rendit dhe se do të vazhdojnë të qëndrojnë te ndërtesa e Komunës së Leposaviqit, deri në plotësimin e tyre.
Ata po kërkojnë që Njësia Speciale e Policisë së Kosovës dhe kryetari i ri të largohen nga objekti i Komunës.
Todiq bashkë së bashku me ish-deputetin serb, Slavko Simiq, më herët janë lejuar të kalojnë kordonin e formuar nga pjesëtarët e KFOR-it dhe të diskutojnë për kërkesat e tyre. Por negocimi ka përfunduar pa sukses.
13:50 - Tensionohet situata në Leposaviq, huliganët po thyejnë veturat
Gazetarja e KOHËS, Marigona Brahimi, njoftoi se protestuesit serbë, kanë nisur t’i thyejnë veturat në Leposaviq.
Veturat që janë demoluar janë ato të ekipeve të gazetarëve të A2 CNN, Panorama dhe News 24.
Anëtari i njërit prej këtyre ekipeve ka thënë se sulmi ka ndodhur në prani të pjesëtarëve të KFOR-it dhe se ata nuk kanë reaguar. Ai ka thënë se nuk e kanë paraqitur rastin në Policinë e Kosovës.
12:55 - Vendosen tela me gjemba afër objektit të Komunës së Zveçanit
Ushtarët e KFOR-it kanë vendosur telat me gjemba afër objektit të Komunës në Zveçan.
Aktualisht, siç raporton gazetarja e KOHËS, Saranda Ramaj, situata është e qetë.
Ushtarët e KFOR-it kanë krijuar barrikadë afër objektit të komunës.
12:25 - Protestuesit serbë sulmojnë gazetarët në Leposaviq
Protestuesit serbë i kanë sulmuar gazetarët në Leposaviq. Kjo u pa në pamjet e KOHËS, kur gjatë transmetimit direkt, protestuesit nisën të gjuanin me gjësende të forta.
11:25 - Todiqi e Simiqi lejohen të futen në objektin e Komunës së Leposaviqit
Ish-kryetari i Leposaviqit, Zoran Todiq, së bashku me ish-deputetin serb, Slavko Simiq, janë lejuar të kalojnë kordonin e formuar nga pjesëtarët e KFOR-it, nga të cilët kanë kërkuar që kryetari aktual, Lulzim Hetemi, të largohet nga objekti.
10:44 - Protestuesit kërkojnë largimin e kryetarit të Leposaviqit nga ndërtesa e Komunës
Protestuesit serbë të mbledhur para objektit të Komunës së Leposaviqit u kanë thënë pjesëtarëve të KFOR-it që duna që kryetari Lulzim Hetemi të largohet nga ndërtesa e Komunës.
Ish kryetari i kësaj komune Zoran Todiq, ka qenë ai që e ka paraqitur këtë kërkesë. Pjesëtarët e KFOR-it kanë thënë se do të flasin me kryetarin Hetemi por se nuk u premtojnë rezultate.
Kjo ka qenë kërkesë e protestuesve, në këmbim të lirimit të hapësirës nga ana e tyre.
10:25 - Policia për veriun: Situatë e qetë, por e brishtë
10:22 - Shmangen tensionet në Zubin-Potok, protestuesit iu afruan barrikadave
Protesta në Zubin-Potok ka pasur një moment tensionimi pasi protestuesit janë afruar deri te barrikadat dhe i kanë shtyrë, me ç’rast ka reaguar edhe Policia duke i larguar.
Gazetari i Kohës, Ardit Kika ka thënë se aktualisht situata është e qetë dhe nuk ka tensione.
Protestuesit janë duke qëndruar larg barrikadave, ndërkohë që afër komunës dëgjohet edhe muzika e lëshuar nga protestuesit.
10:14 - Franca: Kosova e Serbia t’i kthehen dialogut me qasje kompromisi
30 ushtarë të KFOR-it kanë marrë lëndime, ndërsa tre nga ta nga armët e zjarrit gjatë protestave të serbëve në tri komunat në veri, Leposaviq, Zubin-Potok e Zveçan, kundër ushtrimit të detyrës brenda objekteve të komunave nga kryetarët e rinj.
10:13 - Situata në veri - Vuçiqi në takim me ambasadorët e QUINT-it, BE-së, Rusisë dhe Kinës
09:48 - Kryetari i Leposaviqit gjendet në ndërtesën e Komunës
Sipas burimeve të KOHËS kryetari i Komunës së Leposaviqit, Lulzim Hetemi, gjendet në ndërtesën e Komunës.
Nuk është bërë e ditur nëse Hetemi ka qëndruar tërë natën në ndërtesën e Komunës, ose ka dalë e është kthyer sërish mëngjesin e hershëm të së martës.
09:08 - KFOR-i shton barrikadat në Zveçan
Misioni i KFOR-it ka nisur shtimin e barrikadave në Zveçan, me qëllim të sigurimit të një perimetri më të gjerë. Gazetarja e KOHËS, Saranda Ramaj, njoftoi nga vendi i ngjarjes se gazetarët tash kanë mbetur pranë turmës së protestuesve serbë.
KFOR-i ka dalë më reagim më parë, duke iu kërkuar Kosovës dhe Serbisë të marrin përgjegjësi për situatën e krijuar. Misioni kërkoi të parandalohet përshkallëzim i mëtejmë i situatës.
08:31 - Protestuesit vendosin flamurin serb në Zubin-Potok
Protestuesit kanë vendosur flamurin serb në Zubin-Potok.
Derisa është vendosur në një shtyllë elektrike, të tjerët që kanë qenë të mbledhur kanë duartrokitur e brohoritur.
Një numër i madh i protestuesve janë mbledhur para ndërtesës së Komunës së Zubin-Potokut, derisa aty po qëndrojnë edhe ushtarë të KFOR-it.
08:28 - KFOR-i fton Kosovën e Serbinë të marrin përgjegjësi për situatën në veri
Misioni paqeruajtës i KFOR-it i ka kërkuar Kosovës dhe Serbisë të marrin përgjegjësi për situatën e krijuar në veri, duke bërë thirrje që të parandalohet përshkallëzimi i mëtejmë i situatës.
Në një komunikatë. drejtuar mediave, KFOR-i bëri të ditur se se 30 ushtarë janë plagosur të hënën në komunën e Zveçanit gjatë dhunës së protestuesve serbë. 11 ushtarë italian dhe 19 nga kontingjentin hungarez kanë pësuar lëndime të shumëfishta, përfshirë thyerje dhe djegie nga mjetet ndezëse e shpërthyese.
08:10 - Rakiqi e Simiqi iu bashkohen protestuesve në Zveçan
Kryetari i Listës Serbe, Goran Rakiq dhe nënkryetari, Igor Simiq, kanë mbërritur në Zveçan, ku janë mbledhur dhjetëra protestues serbë. Aty rendin po e ruajnë trupat e KFOR-it, derisa ende s’është raportuar ndonjë incident. Gjatë natës është djegur një veturë e KOHËS.
Një nga protestuesit ka thënë para gazetarëve se ka pasur takim me komandantin e KFOR-it dhe se kanë marrë zotim për tërheqjen e njësive speciale e lirim të të arrestuarve.
07:24- Kryetari i Zveçanit: Do të dal sot në zyrë, kam takime
Kryetari i Komunës së Zveçanit, Ilir Peci, deklaroi se të martën do të dalë në zyrën e tij në Komunë, për t’i vazhduar punët. Ai i tha KOHËS se në zyrë do të dalë me ndihmën e trupave të KFOR-it, ndërsa shtoi se ka komunikuar edhe me përfaqësues të Qeverisë.
Në tri komunat në veri të Kosovës, Zveçan, Zubin-Potok e Leposaviq, ka nisur grumbullimi i protestuesve serbë kundër hyrjes së kryetarëve të rinj të këtyre komunave në objektet komunale. E marta shënon ditën e tretë të protestave, që u përcollën me tensione e dhunë nga protestuesit serbë. Një ditë më parë, si pasojë e dhunës së protestuesve pësuan 25 ushtarë të KFOR-it në Zveçan.
KOHA do të qëndrojë në të tri komunat për të raportuar direkt nga vendi i ngjarjes. Gazetarët Saranda Ramaj, Marigona Brahimi e Ardit Kika janë duke raportuar nga tri komunat. Një ditë më parë, gazetarët ishin ndër grupi më i rrezikuar. Pësuan disa mediume me dëme materiale, ndërsa pati edhe tentimsulm ndaj gazetarëve.
Situata më e tensionuar është regjistruar në Zveçan.
+ 33
Mëngjesi i së martës në Zveçan. Fotot: Driton Paçarada/KOHA
