Ish-shefi i grupit parlamentar të PDK-së, Abelard Tahiri, i cili nuk mori vota të mjaftueshme në zgjedhjet e 28 dhjetorit për t'u bërë deputet, ka thënë se do të vazhdojë të jetë zëri i atyre që e votuan në strukturat e PDK-së.
Sipas të dhënave të publikuara nga KQZ-ja deri më tani, Abelard Tahiri mori 16 mijë e 785 vota.
"Faleminderit nga zemra të gjithë ju që më besuat votën tuaj. Edhe pse votat nuk mjaftuan për të siguruar edhe një mandat si deputet, mbështetja juaj është një përgjegjësi e madhe për mua.Do të vazhdoj të jem zëri juaj brenda strukturave të PDK-së dhe të angazhohem me përkushtim për të dhënë më të mirën që di, gjithmonë në shërbim të vendit tim dhe interesit qytetar. Besimi juaj më obligon të mos ndalem", ka thënë Tahiri në rrjetin e tij social Facebook.
