Kandidati i Aleancës për Ardhmërinë e Kosovës (AAK) për kryeministër, Ramush Haradinaj, ka deklaruar se problemi i energjisë elektrike në Kosovë nuk mund të zgjidhet me improvizime apo arsyetime të përditshme, por kërkon plane strategjike, investime afatgjata dhe vendime të guximshme shtetërore.
Sipas Haradinajt, periudha e ndërprerjeve të shpeshta, faturave të paparashikueshme dhe pasigurisë energjetike duhet të marrë fund përfundimisht.
“Energjia nuk është luks. Ajo është themel për zhvillimin ekonomik, funksionimin e bizneseve, arsimin dhe për një jetë dinjitoze të çdo familjeje në Kosovë”, ka theksuar ai.
Haradinaj ka shtuar se qytetarët nuk duhet të jetojnë më me pasiguri të përditshme, duke u shqetësuar nëse do të kenë energji elektrike apo sa do të jetë fatura mujore, por me stabilitet dhe siguri energjetike.
Në fund, ai ka ftuar qytetarët që në zgjedhjet e 28 dhjetorit të mbështesin vizionin e tij për një Kosovë me energji të sigurt, të qëndrueshme dhe të përballueshme.
Ditëve të fundit, Rahoveci, Malisheva, një pjesë e Prizrenit, Lipjanit e Gjilanit janë përballur me reduktime të shumta.
KEDS-i dhe KOSTT-i kanë bërë thirrje të vazhdueshme për kursim.