Shefi i rrjetit social X, Elon Musk, ka paralajmëruar lansimin e Grokut, një platformë online për komunikim, i punuar nëpërmjet inteligjencës artificiale.
Ai ka njoftuar se për këtë “chatbot” është frymëzuar në serialin “The Hitchhiker's Guide to the Galaxy”, derisa ka shtuar se do të jetë i qasshëm për abonentët me pagesë të X-it, menjëherë pas testimit.
Groku, sipas Muskut, do të jetë hapësirë ku përdoruesit e X-it do të kenë mundësi të komunikojnë virtualisht me inteligjencën artificiale.
Musk ka paralajmëruar se ky “chatbot” do të ketë qasje në postimet e përdoruesve të X-it si dhe do të ketë “prirje për të dhënë përgjigje sarkastike”
Ai duket se është inspiruar nga kompania OpenAI që vitin e kaluar ka lansuar platformën ChatGPT, në të cilën punon edhe shqiptarja Mira Murati.
ChatGPT mundëson diskutim dhe shtrim të pyetjeve nga përdoruesi te aparatura që operon nëpërmjet inteligjencës artificiale.
Musk dikur kishte paralajmëruar për rreziqet e mundshme të AI-së.
