Kampionia e Kosovës në futbollin e sallës, Prishtina 01, e ka mbyllur baras 3:3 ndeshjen e parë të fazës nokaut të Ligës së Kampionëve kundër skuadrës nga Letonia, Riga Futsal Club.
Ndeshja e parë e 1/8 së finales së Championsit në futsall u zhvillua në Prishtinë.
Dy golat e parë për Prishtinën 01 i shënoi Drilon Maxharraj, ndërsa golin e tretë e realizoi Ramadan Alaj.
Ndeshja kthyese luhet në Riga të Letonisë më 5 dhjetor.
Nëse “bardhekaltrit” e kalojnë kundërshtarin letonez, në çerekfinale do të luanin me fituesin e ndeshjes Hit Kyiv të Ukrainës dhe Palma Futsal të Spanjës. Palma Futsal është fituese në fuqi e Championsit.
Turneu final do të organizohet në Pesaro të Italisë, nga 8 deri më 10 maj.
Prishtina 01 në fazën nokaut të Championsit në futsall u kualifikua nga vendi i tretë i Grupit 4 të “Main Round”.
Ndeshjen e parë e humbi 19:1 nga Sportingu i Lisbonës, dy herë fitues i Ligës së Kampionëve. Më pas në ndeshjen direkte për vend të tretë e mposhti nikoqiren dhe skuadrën kroate, Novo Vrijeme, me rezultatin 7:6. Humbje tjetër pësoi 4:1 nga Kairat Almaty.