-
Nga:
Arsim Maxhera
- 14 dhjetor 2021 22:15
- Shpërndaje në:
Të enjten prej orës 18:00 hidhet shorti i edicionit të tretë të Ligës së Kombeve të UEFA-s. Pjesë e kësaj gare të re të Konfederatës Evropiane të Futbollit prej fillimit është edhe përfaqësuesja e Kosovës. Madje, Kosova sukseset më të mëdha i ka pikërisht në Ligën e Kombeve të UEFA-s.
Përfaqësueset e të gjitha 55 vendeve anëtare të UEFA-s do të jenë pjesë e edicionit të tretë të Ligës së Kombeve, përkatësisht edicionit 2022/23. Ky kompeticion është i ndarë në katër nivele, përkatësisht në liga. Ndarja e përfaqësueseve në liga bëhet në bazë të renditjes së përgjithshme të edicionit paraprak të Ligës së Kombeve.
Në Ligën A garojnë 16 përfaqësueset më të suksesshme evropiane, që do të ndahen në katër grupe. Në Ligën B janë përfaqësueset e ranguara prej pozitës së 17-të e deri në pozitën e 32-të. Edhe këto 16 përfaqësuese garojnë në katër grupe.
16 përfaqësuese e katër grupe i ka edhe Liga C e Ligës së Kombeve. Kosova është pjesë e kësaj lige. Ndërkohë, në Ligën D, përkatësisht në rangun e katërt, janë shtatë përfaqësuese që do të ndahen në dy grupe. Njëri grup do t’i ketë katër përfaqësuese e njëri tri.
Në Ligën C, ndonëse niveli i tretë i garës, ka përfaqësuese serioze evropiane. Në vazon e parë për shortin e së enjtes janë Turqia, Sllovakia, Bullgaria dhe Irlanda. Turqia është më e ranguara prej Ligës C. Njëra prej këtyre katër përfaqësueseve do të jetë në grup me Kosovën.
Në vazon e dytë janë Greqia, Bjellorusia, Luksemburgu e Maqedonia e Veriut. Kosova është në vazon e tretë, e fundit në të. Lituania, Gjeorgjia dhe Azerbajxhani janë përfaqësueset e tjera të kësaj vazoje, me të cilat Kosova nuk do të jetë në grup. Ndërkohë, vazoja e katërt është ende e hapur. Kazakistani përballet me Moldavinë, ndërsa Qiproja me Estoninë, në plejautin e edicionit të kaluar. Fituesit e këtyre ndeshjeve mbesin në Ligën C, ndërsa humbësit bien në Ligën D. Gjibraltari dhe Ishujt Faroe janë përfaqësueset e tjera të vazos së katërt të Ligës C.
Fituesi i grupit në Ligën C do të promovohet në Ligën B për edicionin 2024/25 të Ligës së Kombeve. Ndërsa, nëse Kosova eventualisht mbetet e fundit në grup, do të luajë në plejaut për të shmangur rënien në Ligën D.
Fituesit e grupeve në Ligën A garojnë për titull të kampionit të Ligës së Kombeve.
Shqipëria është në Ligën B. Është në vazon e katërt së bashku me Slloveninë, Malin e Zi dhe Armeninë. Në vazon e parë të Ligës B janë Ukraina, Suedia, Bosnjë-Hercegovina dhe Islanda. Në vazon e dytë bëjnë pjesë Finlanda, Norvegjia, Skocia dhe Rusia. Izraeli, Rumania, Serbia dhe Irlanda janë në vazon e tretë.
Franca, Spanja, Italia, Belgjika; Portugalia, Holanda, Danimarka, Gjermani; Anglia, Polonia, Zvicra, Kroacia; Uellsi, Austria, Çekia dhe Hungaria janë në Ligën A të Ligës së Kombeve.
Ndeshjet e Ligës së Kombeve luhen në qershor dhe shtator të vitit të ardhshëm. Katër ndeshje janë në qershor (2-4, 5-8, 8-11, 12-14) dhe dy të tjera në muajin shtator (22-24, 25-27).
Në edicionin e parë të Ligës së Kombeve, Kosova ishte në Ligën D. E fitoi grupin ku ishin edhe Azerbajxhani, Ishujt Faroe dhe Malta. Kështu u promovua në Ligën B për edicionin e radhësh dhe po ashtu e fitoi të drejtën e paraqitjes në plejof për kualifikim në Euro 2020. Plejofi ishte shpresë e madhe e Kosovës për kualifikim në Evropian. Por, në gjysmëfinale të plejofit, më 8 tetor të vitit të kaluar, Kosova humbi 2:1 nga Maqedonia e Veriut. Dhe prej atij momenti filloi rënia e madhe e Kosovës. Maqedonia e Veriut në finale të plejofit kishte mposhtur Gjeorgjinë dhe luajti në Evropian.
Në vjeshtën e kaluar u luajt edicioni i dytë i Ligës së Kombeve. Kosova ishte në grupin 3 të Ligës C. Sllovenia e fitoi grupin, duke mbledhur 14 pikë. 12 pikë i kishte Greqia e vendit të dytë, ndërsa Kosova e vendit të tretë mori 5 pikë në gjashtë ndeshje. E fundit në grup mbeti Moldavia, që në mars luan në plejaut, me synim që të mbetet në Ligën C.
Ndërsa edicioni i parë i Ligës së Kombeve jepte rrugë të dytë për kualifikim në Evropian, për edicionin e tretë të Ligës së Kombeve, nuk është njoftuar të ketë ndonjë lidhshmëri me kualifikimet për Euro 2024.
