Veteranë të Flamurtarit dhe të Prishtinës e kanë zhvilluar ndeshjen revyale për nder të 30 vjetorit të pavarësimit të futbollit kosovar.
Duelin që është zhvilluar të hënën e kanë fituar futbollistët e Flamurtarit me rezultatin 4:1.
“Kuqezinjtë” realizuan në pjesën e parë me Enver Prapashticën, Ismet Munishin, Naim Kodraliun dhe Orhan Krasniqin. Ndërkaq, golin e vetëm për veteranët e Prishtinës e realizoi Eroll Salihu, në pjesën e dytë nga penalltia.
Veteranët e Flamurtarit dhe të Prishtinës përballen mes vete çdo vit më 13 shtator për të kujtuar duelin e parë që u zhvillua në vitin 1991, ndeshje që e hapi kampionatin e parë të pavarur të Kosovës në futboll. Të hënën ishin të pranishëm disa figura të rëndësishme të asaj kohe dhe drejtuesit aktual të FFK-së, por munguan emra që kanë dhënë shumë për futbollin kosovar.
FFK-ja e vlerëson 13 shtatorin si një nga datat më të rëndësishme të futbollit të Kosovës. Në këtë datë në vitin 1991, me ndeshjen ndërmjet Flamurtarit dhe Prishtinës, u finalizua misioni i shumë njerëzve guximtar të futbollit në Kosovës, duke filluar kampionati i parë i Republikës së Kosovës.
Në atë periudhë të okupimit nga Serbia, futbolli ishte një segment i rëndësishëm i rezistencës ndaj armikut, por edhe mision i shtetndërtimit.