Pogba lë prapa lëndimet, kthehet në fushë pas gati një viti

Paul Pogba hyri në lojë në minutën e 69-të kur rezultati ishte 2:2. Ai pati një gjuajtje të bllokuar nga një mbrojtës dhjetë minuta më vonë, por nuk u përfshi në dy golat e tjerë që i dhanë Juventusit fitoren 4:2 në derbin lokal kundër Torinos, të martën mbrëma. Megjithatë, kthimi i Pogbas në fushë i dha fund pritjes së gjatë prej gati në viti në një ndeshje zyrtare, ka shkruar të mërkurën AFP. Për herë të fundit, Pogba kishte luajtur në humbjen e Manchester Unitedit 4:0 nga Liverpooli më 19 prill të vitit të shkuar, ndeshje në të cilën u zëvendësua pas vetëm dhjetë minutash.

Shkaku i lëndimit të gjurit, mesfushori që do të jetë 30 vjeç më 15 mars, nuk mundi ta mbyllte sezonin me “Djajtë e Kuq”, duke i dhënë fund me pikëllim pesë vjetëve të kaluara në veri të Anglisë. Por rikthimi i tij verën e kaluar te Juventusi, ku ai kishte luajtur midis viteve 2012 dhe 2016, nuk ndryshoi asgjë në situatën e tij, pasi Pogba vazhdoi të kishte probleme fizike, ku e humbi edhe Kampionatin Botëror “Katari 2022”. I dëmtuar në menisk (gju), Pogba kishte zgjedhur fillimisht të shmangte operacionin në fillim të gushtit 2022 për të mos humbur Botërorin, madje edhe rifilloi stërvitjet, për hidhërimin e Massimiliano Allegrit, i cili kishte kundërshtuar një zgjedhje të tillë. Francezi më në fund duhej të vendoste t'i nënshtrohej një operacioni një muaj më vonë për ta humbur përfundimisht edhe shpresën e fundit që e kishte për të luajtur në turneun e Katarit.

Pogba nuk kishte luajtur ende asnjë minutë të vetme me Juventusin në një ndeshje zyrtare deri ndaj Torinos, ndonëse ishte aktivizuar pak minuta me fanellën e ekipit italian në miqësoren e luajtur në SHBA në korrik kundër Deportivo Guadalajaran. Ajo që e ka frustruar deri më tani Juventusin, ishte se nuk kishte asnjë mundësi për ta përdorur një lojtar që merr 8 milionë euro pagë në vit. E privuar nga një lider në mesfushë, “Zonja e Vjetër” u eliminua në fazën e grupeve të Ligës së Kampionëve për t’u transferuar në Ligën e Evropës, garë në të cilën është kualifikuar në 1/8 e finales. Në Serie A, Juventusi ka rënë poshtë në tabelë pasi iu hoqën 15 pikë nga Federata e Futbollit të Italisë shkaku i mashtrimit financiar. Mirëpo, rikthimi i Pogas në fushë ka dhënë sinjale pozitive për ekipin dhe këtë e ka pranuar edhe trajneri Allegri.

“Pogba bëri një punë të mirë për aq sa luajti në fushë dhe atë pas një mungese prej gati një viti. Kështu që, kthimi i tij na ndihmon shumë për të arritur objektivat që i kemi. Me Pogban në dispozicion do të jetë dukshëm më të fortë dhe besoj se brenda një kohe të shkurtër do të jetë në formën e tij më të mirë”, ka thënë Allegri.

Mungesa e Pogbas ka ndikuar shumë edhe te Franca, e cila humbi në finalen e Botërorit “Katari 2022” nga Argjentina. Mirëpo, kthimi i tij në fushë është një lajm i mirë për përzgjedhësin Didier Deschamps. Pogba rikthehet në kohën e duhur, pasi Deschamps më 16 mars do ta shpallë listën e lojtarëve të ftuar për ndeshjet e para kualifikuese të Euro 2024, me Holandën (24 mars) dhe Irlandën (27 mars). Në rast se ftohet nga Deschamps, atëherë Pogba do të jetë një kandidat shumë serioz për mbajtjen e shiritit të kapitenit pas tërheqjes së portierit Hugo Lloris.

“Sigurisht, që kthimi i Pogbas më gëzon pasi është një lojtar shumë i rëndësishëm. Unë do t’i monitoroj paraqitjet e tij përpara se ta publikoj listën. Ai po kthehet pas gati një viti dhe kjo është shumë e rëndësishme”, ka shtuar Deschamps.

Me rikthimin e tij në fushë, Pogba gjithashtu shpreson të fshijë një vit veçanërisht të trazuar. Ai ka kontratë me Juventusin deri në vitin 2026, ndërsa me fanellën e ekipit italian ka fituar katër tituj kampioni në Serie A përpara se të largohej në vitin 2016.