Napoli i Amir Rrahmanit do të kërkojë vazhdimin e formës së mirë dhe synon fitoren e tetë rresht në elitën e futbollit të Italisë.
Napolitanët të shtunën e hapin xhiron e 24-t të Serie A të Italisë.
Luajnë në udhëtim tek Empoli në ndeshjen që nis në orën 18:00.
Nikoqiri i Napolit është pa fitore në katër ndeshjet e fundit.
Një fitore e mundshme do ta dërgonte Napolin me 18 pikë më shumë në krye të tabelës në krahasim me skuadrën e vendit të dytë, Interin.
Interi të dielën në mesditë luan në udhëtim te Bologna.
Napoli synon të shkëputet në tabelë
Napoli synon që të vazhdojë me suksese në sezonin e jashtëzakonshëm, pas fitores 2:0 në Frankfurt të martën në ndeshjen e parë të 1/8 së finales së Ligës së Kampionëve.
Të përzgjedhurit e trajnerit Luciano Spalletti nuk duket se do të ndalen. Spalletti ka bërë thirrje që duhet të jenë të qetë dhe t’i marrin ndeshjet një nga një.
Për skuadrën e tij do të ishte titulli i tretë në Serie A.
Dy titujt e parë napolitanët i fituan në vitin 1988 dhe 1990 kur në skuadër patën legjendën argjentinase, Diego Armando Maradonën.
Nëse e kalon Frankfurtin në “Champions”, për Napolin do të ishte çerekfinalja e parë në histori të klubit në këtë garë.
Edhe
Napolin e pret derbi me Lazion
Në futbollin e Italisë, Napoli ka lëshuar vetëm shtatë pikë në 23 ndeshje.
Kjo skuadër e ka sulmin dhe mbrojtjen më të mirë. Ka shënuar 56 gola, ndërsa ka pranuar vetëm 15.
Kampioni në fuqi, Milani, ballafaqohet me Atalantan, të dielën në orën 20:45.
Për Milanin është ndeshje e rëndësishme për shkak se lufton për një vend që dërgon në Ligën e Kampionëve në edicionin e ardhshëm.
Milani është i katërti me 44 pikë, kurse Atalanta e gjashta me 41 pikë.
Edhe
Futbolli italian “kthehet” pas javës së vështirë
Xhiroja e 24-t në Serie A mbyllet të martën me derbin torinez, Juventus – Torino.
Ky ballafaqim nis në orën 20:45.
