Kusari-Lila: Nëse nga nesër nuk ka ulje të çmimit të naftës, do ta kthejmë çmimin tavan

Ministrja e Industrisë, Ndërmarrësisë, Tregtisë dhe Inovacionit (MINT), Mimoza Kusari-Lila, ka paralajmëruar rikthimin e çmimit tavan për naftën, nëse rënia e çmimeve në tregun botëror nuk reflektohet edhe në tregun e Kosovës nga nesër. 

Ajo ka thënë se gjatë dy ditëve të fundit ka nisur rënia e çmimit të naftës në tregjet ndërkombëtare, ndërsa paralajmëroi se nëse kjo nuk reflektohet në çmimet vendore që nga dita e nesërme, ministria do të ndërhyjë përmes vendosjes së sërishme të çmimit maksimal.

“Pozitive në këto dy ditët e fundit është fillimi i rënies dhe që nga nesër, nëse nuk ka rënie apo reflektim në tregun në Kosovë, ne do ta kthejmë çmimin tavan, pasi kemi bazë ligjore ta bëjmë atë”, deklaroi Kusari-Lila në Kuvendin e Kosovës, pas pyetje nga deputetja e Aleancës, Albana Bytyqi. 

Ministrja shpjegoi se nga marsi deri më 8 shtator të vitit 2026, Qeveria kishte zbatuar vendimin për çmimin tavan, por pas 8 shtatorit afati kishte skaduar ligjërisht. Pas heqjes së tij, Kusari-Lila ka thënë se Ministria ka vazhduar monitorimin e përditshëm të çmimeve dhe përcaktimin e marzhës së fitimit sipas çmimeve të tregut.

Sipas saj, marzha e naftëtarëve që nga heqja e çmimit tavan nuk e ka kaluar 12 centëshin për litër, ndërsa rritja e fundit e çmimit të naftës në Kosovë, që ka kaluar 1.90 euro për litër, lidhet me shtrenjtimin e saj në tregun botëror.