Te Napoli kanë bërë të gjitha përgatitjet për festë të madhe. Por për ta fituar titullin, Napolit, ku prej lojtarëve më të rëndësishëm është edhe kapiteni i Kosovës, Amir Rrahmani, i duhet fitore të premten ndaj Cagliarin në ndeshjen e fundit të sezonit në Serie A. Shpresa për ta fituar titullin kanë edhe tek Interi.
Finalisti i Ligës së Kampionëve dhe kampioni në fuqi i elitës italiane të futbollit, Interi, është vetëm një pikë prapa liderit. Dhe kështu dita e fundit e kampionatit për këto dy skuadra do të jetë dramatike. Por, ekziston mundësia që këto dy skuadra të luajnë edhe një ndeshje të plejofit për ta përcaktuar fituesin e këtij edicioni.
Napoli ka më shumë shanse për ta fituar titullin. Një fitore ndaj Cagliarit të premten nga ora 20:45 do t’ia mundësonte një gjë të tillë. Barazimi mund të mos jetë i mjaftueshëm, nëse Interi fiton në udhëtim te Como. Edhe kjo ndeshje luhet në orarin e njëjtë.
Për Interin, që ballafaqohet me Paris Saint-Germainin në finalen e “Championsit” më 31 maj, barazimi do të ishte i mjaftueshëm për ta zhvilluar ndeshjen e plejofit për titull me Napolin. Natyrisht, nëse Napoli i Amir Rrahmanit, humb.
Napoli dhe Interi është vendosur të luajnë të premten, për t’i dhënë kohë “nerazzurrëve” të përgatiten sa më shumë për finalen e Ligës së Kampionëve. Nëse në fund të garës janë baras me pikë, finalja e plejofit do të luhet të hënën.
Interi do të ketë detyrë më të vështirë të premten pasi Como ka fituar 20 pikë nga tetë ndeshjet e fundit dhe janë pranë përfundimit të edicionit në vendin e 10-të, që do të ishte pozita më e mirë e skuadrës prej vitit 1986.
Cagliari, që është i 14-ti në tabelë, i ka fituar vetëm nëntë prej 37 ndeshjeve të këtij sezoni. Por, Cagliari e ka siguruar qëndrimin në Serie A pasi ka pesë pikë më shumë se zona që dërgon në kategorinë e dytë.
Trajneri Antonio Conte mund të shkruajë histori, në edicionin e parë në krye të Napolit.
Ish-përzgjedhësi i Italisë mund të bëhet trajneri i parë që e fiton Serie A me tri skuadra të ndryshme.
“I kemi duart në trofe dhe nuk duhet ta lëmë të na ikë”, ka thënë Conte.
55-vjeçari deri tani është fitues i katër kampionateve në Itali. E udhëhoqi Juventusin drejt tre titujve rresht prej vitit 2011 deri në vitin 2014. Më pas me Interin e fitoi titullin në vitin 2021. Në mesin e këtyre viteve ai e fitoi titullin edhe me Chelsean në vitin 2017.
Ka shumë trajnerë që kanë fituar tituj në Serie A me dy skuadra të ndryshme, por asnjëherë me tri. Fabio Capello e ngriti lart trofeun e Serie A me Milanin katër herë dhe me Romën një herë, para se të triumfonte me Juventusin në vitet 2005 e 2006. Por, ata tituj të “bianconerëve” nuk janë të vlefshëm për shkak të skandalit të “Calciopolit”.
Napoli ishte fitues i kampionatit në vitin 2023, ndërsa tani mund të jetë sërish fitues, në njërin prej titujve më të rëndësishëm në karrierën e Contes.
Nga skuadra u larguan Victor Osimhne, Khvicha Kvaratskhelia e Kim Min-Jae, por Conte e transformoi menjëherë Napolin në fitues potencial të titullit.
“Shpresoj që ta festojmë titullin, sepse do të ishte diçka e bukur, po ashtu për energjinë të cilën e kemi shpenzuar. Do të më shpaguhej çdo gjë për të cilën kam punuar këtë vit. Kam shkuar përtej limiteve. Jam shumë i lodhur, por do të shkojmë deri në fund”, ka deklaruar Conte.
Napoli është fitues i Serie A edhe gjatë kohës së artë të Diego Armando Maradonës, në vitet 1987 dhe 1990. Juventusi e mban rekordin me 36 tituj, ndërsa Interi ka 20 tituj, një më shumë se rivali i qytetit, Milani.
