Skuadra e Chelseat po shihet si favorite për të siguruar shërbimet e qendërmbrojtësit të Real Madridit, Raphael Varane ka njoftuar të hënën “Mundo Deportivo”. Bëhet e ditur se Varane po dëshiron transferimin te Chelsea dhe tashmë ekipi nga Londra ka parakaluar Manchester Unitedin e Paris Saint-Germainin për transferimin e 28-vjeçarit.
Varane pritet të largohet nga Real Madridi këtë verë pasi ka refuzuar rinovimin e kontratës që i skadon vitin tjetër derisa Chelsea është e gatshme të paguajë mbi 50 milionë euro dëmshpërblim për transferimin e tij. Varane pëlqehet nga trajneri i Chelseat, Thomas Tuchel që po e sheh si përforcim të rëndësishëm për repartin e mbrojtjes.
Varane këtë sezon ka 38 paraqitje dhe dy gola të shënuar në të gjitha garat për Real Madridin, ekip të cilit iu bashkua në vitin 2011 nga Lensi.