Barcelona ka shënuar fitore shumë të vështirë ndaj Levantes së fundit të tabelës. Të dielën mbrëma, Barça fitoi 3:2, falë golit të shënuar nga rezervisti Luuk de Jong në minutën e 92-të. Ai shënoi me goditje me kokë pas krosimit të Jordi Albas.
Ndeshja ishte dramatike. Jose Luis Morales shënoi nga pika e bardhë për rezultatin 1:0 në të mirë të Levantes (52’). Roger humbi penalltinë e dytë të Levantes, në minutën e 56-të.
Pierre Emerick Aubameyang shënoi në minutën e 59-të pas asistimit të Ousmane Dembeles për rezultatin 1:1. Pedri shënoi për 2:1 në të mirë të Barcelonës, në minutën e 63-të.
Por Levante fitoi penallti tjetër, të tretën në ndeshje. Atë e konkretizoi Gonzalo Melero në minutën e 83-të. Rezultati u barazua në 2:2.
Barcelona tani është e dyta në La Liga me 60 pikë nga 30 ndeshje. Levante është e 19-ta me 22 pikë dhe thuajse në kategorinë e dytë.
Enis Bardhi luajti prej minutës së 76-të te Levante.
