Sulmuesi kosovar, Albian Ajeti ka thënë se po shijon çdo minutë te Celticu, pasi ka shënuar golin e fitores në ndeshjen ndaj Dundee United, të shtunën. Reprezentuesi i Zvicrës u aktivizua si zëvendësues dhe shënoi golin e fitores në takimin e xhiros së pestë të kampionatit të Skocisë. Për Ajetin ishte debutim për Celticun.
“Jam shumë i lumtur. Mbi të gjitha ishte fitore e rëndësishme për ne. Nuk ishte lehtë. Dundee United e bëri shumë të vështirë dhe bëri çdo gjë të mundur për të na mposhtur. Ne kemi pasur raste kështu që ishte çështje kohe se kur do të shënonim golin e parë. Të gjithë ishin shumë të lumtur dhe më kanë uruar. Ne kemi marrë tri pikë dhe kjo është më e rëndësishmja”, ka thënë Ajeti për faqen zyrtare të Celticut.
Ajeti (23) është transferuar nga West Ham Unitedi, ku nuk kishte pasur sukses. Të shtunën ai u aktivizua në minutën e 73-të për kampionin skocez, ndërsa golin e fitores 1:0 e shënoi në minutën e 83-të.
“Kam qenë shumë i motivuar. Nuk ishte lehtë për mua vitin e kaluar, kështu që çmoj secilën minutë që e luaj. Gjithnjë mundohem të ndihmojë ekipin dhe jam i lumtur që kam qenë në gjendje të bëjë këtë. Unë mendoj se nëse je i lumtur, gjithnjë do të jetë i suksesshëm. Nuk është mirë të vësh veten në presion. Duhet të shijosh gjërat aty ku je dhe unë vërtetë po e shijoj kohën te Celticu”, ka shtuar ai.
