Ndarja e 1.9 milionë eurove nga Pakoja e Ringjalljes Ekonomike për sportin, ka bërë të njohura edhe organizata të ndryshme që pretendojnë se merren me zhvillimin e sportit në vend. Madje disa prej tyre kanë përfituar shuma të majme nga ky fond, shpërndarjen e të cilit e ka bërë Ministria e Kulturës, Rinisë dhe Sportit.
Një organizatë për të cilën dihet pak dhe për të cilën po ashtu ka pak informata në internet, ka përfituar plot 134 mijë e 740 euro.
Bëhet fjalë për organizatën “Center for Health Education and Inclusion Cohesion – Mitrovicë”. Kështu të paktën e ka shkruar emrin e saj MKRS-ja. Mbi 134 mijë, që është dukshëm më tepër se buxheti vjetor i shumë prej federatave, kësaj organizate i takojnë për projektin “Data baza e sportit në Kosovë – DSK”.
“Pl4y International” është një tjetër organizatë me hise të madhe në buxhetin për ringjallje. Asaj i takojnë 50 mijë euro për projektin “Kosovo Players”, emër që nuk shpjegon thuajse asgjë.
Gjithsej janë 234 përfitues, shumica klube sportive e federata. Për shumicën e klubeve janë ndarë nga 3000 euro, por ka pasur edhe përjashtime, përkatësisht ndarje të shumave dukshëm më të mëdha.
Edhe
Databazë nga Fondi i ringjalljes ekonomike, MKRS-ja arsyeton ndarjen e 121 mijë eurove për një organizatë
Por as organizatat nuk kanë mbetur keq.
OJQ Foleja Prizren ka përfituar 3000 euro, sa edhe OJQ “Marakli t’Biciklave”.
Për projektin “Vrapo Babadimër”, Projekti 5 Cent ka përfituar 3000 euro. Aq i kanë takuar edhe “Graçanica Inovation Center”, për projektin “Aktivizimi i Sportit nëpërmjet lojërave të bordit”. Kjo fjali në fakt nuk shpjegon asgjë.
6000 euro i takojnë, në bazë të vendimit, organizatës “Demokraci Përmes Sportit Dem Sport”, për projektin “Sporti i sigurt dhe gjithëpërfshirës”.
Për projektin “Shëndeti në Sport”, organizatës “Kosova’s Organisation of Medical Students KOMS”, i janë ndarë plot 8050 euro.
Madje është përkrahur edhe projekti “sporti kundër coronës”, i organizatës “NVO Raskrsce”. Për këtë organizatë në dispozicion janë 3000 euro.
8720 euro janë ndarë për “3x3 Prishtina” për projektin: “3x3 satelite 2021; Istogu Edition, Celebrity game-Black Mamba day etj”. Pra bëhet fjalë për projekte të kësaj organizate të basketbollit tre kundër tre.
Edhe
MKRS-ja pranon lëshimet, aplikacionet për sport kthehen në rivlerësim
“Bo Bowling” është mbështetur me 3550 euro, ndërsa 3000 euro i takojnë një organizate për mbështetjen e të rinjve në Graçanicë.
Ka kohë që ka dyshime nëse buxheti për sport ndahet në mënyrë të drejtë. Ndarja e fundit vetëm e forcon këtë bindje. Të paktën një vlerësim të tillë e kanë në Federatën e Volejbollit të Kosovës. Federata që ka dhjetëra klube, është mbështetur me 18 mijë euro, por ka refuzuar të nënshkruaj kontratën.
