Mbi 25 mijë vizitorë në pishinën e Gërmisë këtë verë

Me rritjen e temperaturave, Pishina e Gërmisë është kthyer në një prej destinacioneve më të frekuentuara për freski dhe argëtim. Qytetarë, por edhe turistë, po i drejtohen pishinës për t’u larguar nga temperaturat e larta dhe për të kaluar kohë në ambient të hapur. Krahas fluksit të vizitorëve, në fokus mbetet edhe siguria e tyre, për të cilën kujdesen shpëtimtarët dhe ekipi mjekësor që qëndron në gatishmëri gjatë gjithë orarit të punës.

E ndërtuar në vitin 1987. Pishina e Gërmisë për dekada me radhë ka qenë një prej pikave më të frekuentuara gjatë ditëve të nxehta të verës në Prishtinë.

Dikur e njohur edhe si “Liqeni i Gërmisë”, sot ajo vazhdon të mbledhë qytetarë që kërkojnë freski dhe relaks.

Por, përveç argëtimit, në një hapësirë të tillë rëndësi të veçantë ka siguria, pastërtia dhe mirëmbajtja e ujit.

Edhe këtë verë, pishina ka hapur dyert për qytetarët, me synimin që vizitorët të kalojnë ditët e nxehta në kushte sa më të mira.

Selim Selimi, vizitor në këtë pishinë, ka thënë se shkon shpesh, kryesisht për të kaluar kohë me nipin e tij, por edhe për të shijuar vetë pishinën e kryeqytetit.

Edhe Arbëri 14 kor 2026 Analizat e nxjerrin të sigurt ujin e pishinës së Gërmisë, Krasniqi: Politika të lihet anash

“Unë vij bashkë me nipin. Është një vend shumë i mirë, kushtet më kanë befasuar shumë për të mirë...”, ka thënë ai. “Vendi është shumë i përshtatshëm për fëmijë....”

Në hapësirat e pishinës nuk mungojnë as shpëtimtarët të cilët gjithmonë janë në gatishmëri për t’iu dalë në ndihmë qytetarëve.

Tefik Fazliu ka thënë se tash e 26 vjet në Pishinën e Gërmisë nuk ka pasur asnjë mbytje.

“Po vet fakti që jemi ne prezent këtu e tregon rendësinë e madhe për shkak që ne jemi për të shpëtuar jetë. Pra secili qytetar i cili vjen dhe e frekuenton këtë pishinë të mrekullueshme, tek ta intervenojmë kështu që tash e 26 vjet po bëhet puna ime si shpëtimtar, është lajmi më i mirë që nuk kemi mbytje, por disa qytetar e përziejnë vdekjen me mbytjen, të gjitha vdekjet kanë ndodh prej sulmit kardiak...”, ka thënë ai.

Sipas Fazliut, qytetarët tanimë janë vetëdijesuar, nëse shohin një rast mbytjeje i thërrasin menjëherë shpëtimtarët.

“Ka pas raste por tani qytetarët janë vetëdijesuar dhe kur shohin ndonjë rast mbytjeje na thërrasin neve.... Për të gjithë qytetarët të cilët e frekuentojnë jo vetëm pishinën e Gërmisë por në të gjitha pishinat në Kosovë, këshilla më e mirë e imja është se të gjithë familjarët, fëmijët e tyre t’i dërgojnë në shkolla të notit, është domosdoshmëri, noti është i jashtëzakonshëm, për veç se është sport është edhe art”, ka thënë ai.

Menaxherja e Departamentit të Pishinës së Gërmisë, Medina Krasniqi Mushica, shton se deri më tani këtë pishinë e kanë frekuentuar deri në 25,000 qytetarë.

Edhe Arbëri 21 qer 2026 Hapet Pishina e Gërmisë

“Këtë vit sezoni veror ka filluar shumë mirë dhe po ecën mirë, nuk kemi pas probleme dhe është gjithçka në rregull deri më tani. Deri më tani Pishinën e Gërmisë e kanë frekuentuar deri në 25,000 veta, sipas disa statistikave që i kemi nxjerrë”, ka thënë ajo duke shtuar se sivjet ka pasur rritje të numrit të vizitorëve në krahasim me vitet e kaluara.

Pishina e Gërmisë këtë vit është hapur më 20 qershor, tha menaxherja.

“Ne zakonisht hapjen dhe mbylljen e pishinës i bëjmë më mbarimin e shkollave dhe fillimin e shkollave të nxënësve, që fëmijët me qenë më të lirë, mos me pas angazhime tjera me ardh me u relaksu”, ka thënë ajo.

Hyrja në pishinë deri në moshën 16-vjeçare duhet të jetë me prindër ose me kujdestarin, shtoi Krasniqi Mushica.

Deri në moshën 6 vjeçare hyrja është pa pagesë, prej 6 vjet deri në 16 vjeç është 2 euro, ndërsa për të rriturit 4 euro, edhe gjatë vikendit për fëmijë është 2 euro ndërsa për të rritur 5 euro.

Lojëra dhe aktivitete të ndryshme bëhen edhe në këtë pishinë. Në hapje të saj ka filluar edhe shkolla e notit e tani edhe pa pagesë për të gjithë fëmijët, tha menaxherja.

Edhe Kulturë 22 kor 2026 Arkeologët në Turqi zbulojnë pishinën antike me standarde olimpike

Ani pse është një ambient argëtimi, në Pishinën e Gërmisë për çdo rast emergjent janë të angazhuar edhe dy infermierë dhe një doktoreshë, të cilët qëndrojnë në gatishmëri gjatë kohës sa është e hapur pishina.

Pishina e Gërmisë është e hapur çdo ditë prej orës 10:00 deri në orën 18:00 për të gjithë qytetarët e vendit dhe turistët të cilët dëshirojnë ta vizitojnë.