-
Përktheu:
Vita Abrashi-Kajtazi
- 4 dhjetor 2025 23:20
- Shpërndaje në:
Leonardo DiCaprio, fitues i shumë çmimeve dhe yll i filmave si “Catch Me If You Can”, “The Departed” dhe “The Wolf of Wall Street”, u ka dhënë një këshillë të fortë aktorëve të rinj: mos e shikoni karrierën si garë të shpejtë, por si një rrugëtim afatgjatë.
“Nëse e doni këtë profesion, nëse e doni aktrimin, duhet ta kuptoni se është maratonë, jo sprint. Dhe kjo nuk do të thotë: ‘Mos bëj projekte komerciale, mos e provo këtë shumë herët’”, ka thënë aktori për "Deadline".
Sipas "Deadline", nëse DiCaprio do të refuzonte të punonte në filmin “Titanic” e të luante rolin e Dirk Digglerit në filmin “Boogie Night”, kush e di se çfarë do të kishte ndodhur. Në vend të këtij roli, ai nderoi marrëveshjen me regjisorin e mirënjohur James Cameron, dhe pjesa tjetër është histori.
51-vjeçari ka shpjeguar se një karrierë e qëndrueshme ndërtohet me durim.
“Duhet të mendoni për karrierën tuaj 20, 30, 40, 50 vjet më pas, dhe të vendosni gurët e themelit që zgjasin. Ndoshta ekspozimi i tepërt mund të jetë i dëmshëm”, ka thënë ai.
DiCaprio ka kujtuar se, që në fillim të karrierës, kishte një instinkt të fortë për të shmangur mbingopjen me projekte dhe ekspozimin publik.
“Isha me fat që e kuptova herët rrezikun e ekspozimit të tepërt. Në atë kohë ishte ndryshe. Aktorët ruanin privatësinë, nuk dije shumë për ta. Sot rrjetet sociale e kanë ndryshuar lojën”, ka thënë ai.
Aktori ka theksuar se suksesi i hershëm nuk erdhi rastësisht; ai punoi shumë në filma të pavarur përpara se të shpërthente në Hollywood.
“I pashë aktorët të ndërtonin një trup pune cilësor me kalimin e kohës. Nuk i pashë të shpërthenin me shumë filma brenda një ose dy vjetëve. Kjo nuk do të thotë që nuk duhet të pranoni punë, por duhet të dini si ta ndani, të zgjidhni role mbështetëse interesante dhe të lini gjurmë”, ka thënë ylli.
DiCaprio kujton gjithashtu se filmi i mirënjohur “Titanic” ishte pika e kthesës.
“Isha shumë me fat, shumë herët. Dhe siç kam thënë, ‘Titanic’ ishte momenti që më lejoi të zgjedh vetë filmat e mi. Para asaj, bëra shumë filma të pavarur, gjithmonë zgjidhja personazhin që më dukej më interesant dhe me të cilin mund të punoja në thellësi”, ka thënë ai.