Aktorja e njohur hollivudiane, Jennifer Aniston, ka treguar se babai i saj, John Aniston – i cili u bë i famshëm me rolin e Victor Kiriakis në serialin televiziv Days of Our Lives – e kishte këshilluar të mos merrej me aktrim, nga frika e refuzimeve dhe vështirësive që përfshin kjo karrierë.
Në një intervistë për podcastin Armchair Expert të aktorit Dax Shepard, 56-vjeçarja rrëfeu: “Babai më thoshte: ‘Të lutem mos e bëj këtë. Do të përjetosh vetëm refuzime’.”
John Aniston kishte studiuar fillimisht mjekësi në Greqi, përpara se të përqendrohej në aktrim. Jennifer, me tone humori, shtoi: “Po, gjithsesi do përfundosh në Greqi. Gjej një punë të vërtetë. Të gjitha ato këshillat klishe.”
Aktori John Aniston luajti në serialin Days of Our Lives për 37 vjet, deri në vdekjen e tij në vitin 2022. Jennifer kujtoi me emocion: “Ai ishte në atë serial përjetë. Në fakt, episodi i fundit që xhiroi u transmetua një javë pas vdekjes. Pra, punoi deri në fund. Ishte fjalë për fjalë ‘The End’ për John-in.”
Ndërkohë, Aniston ka zbuluar se dëshiron të rikthehet në rolin e Dr. Julia Harris nga filmat komedi “Horrible Bosses”. Ajo e konsideron komedinë si një nevojë thelbësore në jetën e përditshme.
E pyetur nga revista People se cilin projekt të mëparshëm do të dëshironte ta rikthente, Aniston u përgjigj: “Horrible Bosses. Jason Bateman dhe unë kemi folur për këtë, po ashtu edhe Charlie Day. Mendojmë se do të ishte shumë argëtuese.”
“Karakteret janë të çmendur dhe qesharake. Mendoj personalisht se komedia është e domosdoshme. Do të ishte vërtet kënaqësi të shohim se ku janë ata personazhe sot.”
Pavarësisht sukseseve të mëdha në karrierë, përfshirë rolin e Rachel Green në serialin legjendar “Friends”, Jennifer Aniston ka ende një ëndërr artistike që dëshiron ta realizojë: të luajë në një shfaqje në Broadway.
“Me patjetër dua të bëj një shfaqje në Broadway. Është në listën time të dëshirave, por është çështje kohe dhe gjetjeje të materialit të duhur. Por, është diçka që patjetër dua ta realizoj”, përfundoi aktorja.