Cardi B në gjyq për sulm ndaj një roje sigurie, dëshmia e saj bëhet virale

Reperja e njohur Cardi B po përballet me gjyq në Los Angeles për një incident të vitit 2018, ku akuzohet se ka ushtruar dhunë ndaj një roje sigurie në një klinikë gjinekologjike në Beverly Hills.

Roja e sigurisë, Emani Ellis, pretendon se Cardi B e ka sulmuar në korridorin e klinikës dhe ka kërkuar 24 milionë dollarë dëmshpërblim.

Nga ana e saj, reperja 32-vjeçare pranoi se kishte pasur përplasje verbale, por ka mohuar kategorikisht që e ka goditur Ellisin.

Një video nga dëshmia e saj u bë virale në TikTok, ku Cardi përshkruan me humor dhe gjuhë të drejtpërdrejtë momentin e sherrit.

Kur u pyet nëse ishte e paaftë gjatë përplasjes, pasi Ellis pretendon se ajo e ka gërvishtur me thonjtë e saj, Cardi ka thënë se kur “je shtatzënë je e paaftë”.

“Në atë moment, kur je shtatzënë, je shumë e paaftë. Doni t’ju tregoj gjërat që s’mund t’i bëja? Isha shtatzënë. S’mund ta mbroja veten, edhe po të doja. Ajo është dy herë më e madhe se unë”, ka thënë Cardi.

Në një moment tjetër, duke i hedhur flokët prapa shpatullave, reperja ka thënë me ironi se atëherë ishte më e dobët e peshonte më pak.

“Atëherë unë peshova vetëm 59 kilogramë”, ka thënë ajo.

Kur u pyet nëse mendonte se Ellis ishte mbipeshë, Cardi shikoi përreth sallës me një qëndrim tallës, duke lënë të nënkuptohet se po e konsideronte të tillë, gjë që shkaktoi të qeshura në sallë.

Në kohën e incidentit, Cardi ishte shtatzënë me vajzën e saj të parë, Kulture, që tani është 7 vjeç. Ajo dhe ish-bashkëshorti i saj, Offset, tani kanë tre fëmijë, Kulture, djalin Wave 3 vjeç dhe Blossom pothuajse 1 vjeçe. Çifti ndërkohë është ndarë.