Përshëndetje, aventurierë të vegjël! Sot kemi bërë një udhëtim të jashtëzakonshëm në botën magjike të shkencës, këtu në “Laboratorin eksperimental të kopshtit ‘Arbëria’”. Të veshur me mantelet tona të bardha dhe syzet mbrojtëse, hymë në një vend plot surpriza, ku gjithçka nis nga kureshtja dhe përfundon me zbulime të mahnitshme. Eja të kujtojmë bashkë çdo eksperiment të veçantë që krijuam sot!
Eksperimenti i Vullkanit
Aventura jonë nisi me një shpërthim. Në “Eksperimentin e vullkanit” përdorëm sodë buke, uthull dhe disa pika ngjyruese ushqimore për të krijuar një vullkan të vogël. Filluam duke shtuar sodën e bukës në një tas dhe pastaj hodhëm uthull sipër saj.
Dhe çfarë ndodhi? Një “llavë” plot flluska dhe ngjyra filloi të derdhej jashtë, fiks si një vullkan i vërtetë. Kjo ndodhi falë një reaksioni kimik mes sodës së bukës dhe uthullës, që çliroi një gaz të quajtur dyoksid karboni. Ishte një mënyrë e mrekullueshme për të parë shkencën në veprim - argëtuese dhe plot surpriza.
Eksperimenti i shkumës së elefantit
Eksperimenti i dytë ishte po aq magjik sa i pari. Këtë herë provuam “Shkumën e elefantit“. Për këtë përdorëm të bardhët e vezëve, sodën e bukës, uthullën dhe disa pika ngjyruese ushqimore.
Fillimisht rrahëm të bardhët e vezëve derisa u bënë të buta dhe të fryra. Pastaj shtuam sodën e bukës dhe hodhëm uthull. Papritmas, një mal shkume plot ngjyra filloi të ngrihej lart duke krijuar një skenë magjike.Shkuma ishte kaq e madhe, sa dukej sikur ishte krijuar nga një elefant gjigant. Ky reaksion ndodhi sepse të bardhët e vezëve mbajtën flluskat e gazit të çliruar nga soda e bukës dhe uthulla, duke krijuar një shkumë që dukej e pafund.
Ishte një kombinim perfekt mes shkencës dhe argëtimit.
Eksperimenti i akullit të thatë
Për finalen tonë të madhe provuam një eksperiment të veçantë dhe të jashtëzakonshëm:
“Eksperimentin e akullit të thatë“. Për këtë eksperiment përdorëm akull të thatë, një material që është shumë më i ftohtë se akulli i zakonshëm. Për ta trajtuar me kujdes, përdorëm mbajtëse të posaçme për t’u siguruar që ishim të sigurt.
E vendosëm akullin e thatë në një epruvetë gjigante të mbushur me ujë të ngrohtë. Dhe sapo akulli i thatë preku ujin, filloi magjia. Një re e bardhë avulli filloi të ngrihej dhe të shpërndahej në të gjithë dhomën, duke krijuar një atmosferë magjike. Avulli lëvizte me elegancë, duke na bërë të ndiheshim si në një botë përrallash.
Ishte një spektakël i mahnitshëm që na tregoi fuqinë e shkencës dhe bukurinë e saj.
Dhe kështu përfundon aventura jonë në kopsht. Sot mësuam se si përbërës të thjeshtë, si soda e bukës, uthulla, të bardhët e vezëve dhe akulli i thatë mund të shndërrohen në eksperimente magjike dhe plot argëtim. Por, mbi të gjitha, mësuam se shkenca nuk është vetëm për libra dhe laboratorë - ajo është një mënyrë për të zbuluar botën rreth nesh, për të bërë pyetje dhe për të eksperimentuar pa frikë.
Mirupafshim, miq! Shihemi sërish në “Programin Fluturues të Fëmijëve“!
