Usyk për ngritjen e moralit të ushtarëve ukrainas dhe mbajtjen e qetë të Tyson Furyt

Kampioni i padiskutueshëm botëror i kategorisë së rëndë të boksit profesionist, Oleksandr Usyk, thotë se nuk dëshiron të shihet si ikonë. Ukrainasi thjesht dëshiron të boksojë mirë dhe ta fitojë revanshin e së shtunës me Tyson Furyn

Kampioni i botës në kategorinë e rëndë të boksit profesionist, Oleksandr Usyk, paraqitet aq i relaksuar sa që duket se e harron barrën e përgjegjësisë që e mban. Derisa lufta e Ukrainës kundër Rusisë po vazhdon, Usyk e di se miliona njerëz mbështeten tek ai në pritje për një lajm të mirë. Usyku të shtunën në Riad të Arabisë Saudite i mbron titujt botërorë ndaj Tyson Furyt.

Lufta e parë mes tyre, në maj, e nxori Usykun fitues me një vendim të ndarë të gjyqtarëve. Ishte një betejë e ashpër, por Usyk mezi flet për ndikimin e arritjes së tij në moralin e ushtarëve ukrainas.

“Sigurisht që po flisja për meçin me ushtarët ukrainas, me miqtë e mi që tani po e mbrojnë vendin tonë”, thotë Usyk. “Unë do t’ju tregoj një histori. Është vija e frontit ku po zhvillohen luftimet. Djemtë në vijën e dytë kanë komunikime speciale me vijën e parë të fronitit. Ata kanë pseudonime si ‘Raketa’”.
Usyk ndal tregimin derisa buzëqesh pak. Ai vazhdon të interpretojë bisedat në fushën e betejës, pasi e mposhti Furyn.

“Ata thanë ‘Raketë, Raketë, a po më dëgjon?’ Intonacioni i tyre ishte shumë serioz kur morën telefonin për herë të parë. Përgjigjja ishte: ‘Po, po, çka ka ndodhur? Çka të bëjmë ne?’ Ata mendonin se ishte një emergjencë që kishte të bënte me luftën. Por më pas morën informacionin se unë isha kampion i padiskutueshëm i botës dhe nisën brohoritjet”, tregon Usyk.

Disponimi në Ukrainë ishte ngritur, të paktën për një kohë, me fitoren e Usykut. Ai tregon se kishte gëzim të njëjtë edhe te tre fëmijët e tij që qëndruan në shtëpi dhe e panë meçin në televizor. Por para se fitorja e babait të tyre ndaj Furyt të konfirmohej, ata kaluan moment të vështirë.

Edhe Luftarake 20 maj 2024 Rrëfimi i pabesueshëm i kampionit ukrainas, Usyk

“Ata ishin shumë të frikësuar dhe nervozë, dy djemtë e mi dhe vajza”, e thjeshtëzon situatën Usyk.

“Kur shkova në shtëpi më thanë se tani jam legjendë e vërtetë. Por unë u them se ‘legjendë’ është gjë shumë e madhe. Nuk më pëlqen kjo. Unë dua të jem një djalosh i thjeshtë. Nuk dua që të tjerët të më shohin si ikonë. Nuk më duhet kjo”, thotë ukrainasi.

Para meçit të parë, Fury e kishte ngacmuar Usykun rregullisht. Por ai ishte shumë më i respektueshëm prej se e ndanë ringun në 12 raunde brutale.

“Tysoni flet më pak se që është mësuar”, pajtohet Usyk. “Ndoshta ai ka ndryshuar. Ndoshta është lojë e tij. Nuk brengosem për atë që thotë për mua. Nuk kam zemërim ndaj tij, vetëm respekt”.

Usyk gjithashtu ndien dhembshuri për kundërshtarin gjigant. Në vend se të jenë vetëm luftëtarë, Usyk e Fury, ndiejnë një lidhje si baballarë. 

Usyk bëhet dukshëm më serioz kur përmend faktin se gjatë luftës së parë, gruaja e Furyt, Paris, kishte një abort në muajin e gjashtë të shtatzënisë. 

“Është shumë e trishtueshme. Lutem që gjithçka të jetë mirë për ta dhe të mos jetë një traumë e thellë që do të ketë ndikim në jetën e tyre. U uroj gjitha të mirat”.

Usyk reflektoi mbi pikëllimin për vdekjen e babait në vitin 2012, në një moment prekës menjëherë pas fitores ndaj Furyt në maj. Në katër të mëngjesit, me fytyrën plot plagë nga meçi i pamëshirshëm, Usyku foli për atë se si babai i tij i ishte paraqitur vazhdimisht në ëndrra në muajt e fundit.

Edhe Luftarake 15 pri 2026 Usyku arsyeton vendimin për t’u përballur me kikboksier

Dhe në vend që të lartësonte statusin e tij si kampion i padiskutueshëm i kategorisë së rëndë, Usyk nisi të qajë me zë të ulët duke thënë: “Më mungon babai im. Por i them ‘hej, dëgjo, ti jeton atje’”.

Lotët mbushën sytë e Usykut derisa ai drejtoi kokën nga qielli.

Tani ukrainasi tund kokën derisa kujton emocionet.

“Sigurisht që ai është ende i pranishëm në jetën time. Nuk mund të isha ndryshe duke ditur se çka ka bërë për mua. Tani ai paraqitet më pak në ëndrrat e mia, apo nuk paraqitet fare, sepse mendova që nuk duhet. Ndoshta do të shfaqet në ditët e fundit para luftës. Por e mbaj mend, e mendoj shpesh, i shikoj fotot e tij. Ai është gjithmonë me mua”, ka vazhduar Usyk fjalimin për babain e tij.

Entuziazmi te Usyku kthehet kur flet për fitimin e gjithë titujve të kategorisë së rëndë. Përmend vizitën që ia bëri Lennox Lewis në kampin stërvitor. Usyk është i pari që ka unifikuar titujt e kategorisë së rëndë në këtë shekull. E arritura e tij krahasohet me atë të Lewisit në vitin 1999.

Usyku nuk ka dyshime që Lewis është legjendë.

“Ishte gjë e mrekullueshme”, thotë ai për vizitën.

“Dikur e shikoja në televizor duke luftuar. Tani ai është në kampin tim, duke parë sparingun tim. Unë i thashë: ‘Hej Lenox, të mungon boksi, të mungon përgatitja?’ Ai më tha: ‘Po, natyrisht’. Ishte gjë e madhe të jem me të. Mora një fotografi dhe i kërkova që ta nënshkruante për djemtë e mi. Babai i gruas sime po ashtu kishte kërkuar një nënshkrim dhe një fotografi”.

Edhe Luftarake 19 kor 2025 Usyk: 38-vjet është vetëm fillimi, ndoshta tani me Tyson Furyn

Nuk ka mbetur shumë kohë para se Fury të kthehet në ring dhe të përballet sërish me Tyson Furyn. Buzëqeshja e Usykut zbehet derisa mendon për revanshin dhe shpjegon se çka duhet të bëjë për të arritur një fitore tjetër për vendin e tij dhe fëmijët e tij.

“Duhet të jem më i mirë se në luftën e parë”, thotë Usyku me një zë fitues.