Hot-dog apo hamburger? Dietologët tregojnë cili është më i mirë për zemrën

Piknikët dhe festat verore shpesh shoqërohen me ushqime të shpejta si hot-dogë dhe hamburgerë, por kur bëhet fjalë për shëndetin e zemrës, këto ushqime nuk konsiderohen ndër zgjedhjet më të mira.

Megjithatë, Eating Well ka shkruar se sipas ekspertëve nuk është e nevojshme t’i shmangni plotësisht, por të bëni zgjedhje më të zgjuara.

Sipas dietologes Laura Burak, një menu e balancuar për një ndejë me grill duhet të përfshijë burime proteinash, shumë fruta dhe perime me ngjyra, si dhe karbohidrate të shëndetshme.

“Një dietë e shëndetshme fokusohet te balanca e përgjithshme e ushqimeve dhe jo te një ushqim i vetëm”, ka thënë ajo.

Pse hot-dogët nuk janë zgjedhja më e mirë?

Hot-dogët konsiderohen ushqime të shumëpërpunuara. Ato përmbajnë sasi të larta kripe, yndyrash të ngopura dhe konservuesish, të cilët mund të ndikojnë negativisht në tensionin e gjakut dhe nivelin e yndyrës së dëmshme ne gjak.

“Hot-dogët kanë shumë natrium dhe yndyra të ngopura, të cilat mund të rrisin rrezikun e sëmundjeve kardiovaskulare kur konsumohen rregullisht”, ka shpjeguar dietologia Katharine Rosenthal.

Ekspertët këshillojnë të kontrollohen etiketat dhe të zgjidhen produkte me më pak se 400 miligramë natrium për copë.

Po hamburgerët?

Megjithëse mishi i kuq ka qenë shpesh objekt debatesh, dietologët thonë se hamburgerët mund të jenë pjesë e një diete të ekuilibruar nëse konsumohen me masë.

“Mishi i viçit siguron proteina cilësore, hekur, vitaminë B12 dhe zink, të cilat janë të rëndësishme për organizmin dhe shëndetin e zemrës”, ka thënë Burak.

Megjithatë, ekspertët rekomandojnë zgjedhjen e mishit më të dobët, me 85 deri në 90 për qind mish pa yndyrë, për të reduktuar sasinë e yndyrave të ngopura.

Cila është zgjedhja më e mirë?

“Me keqardhje për adhuruesit e hot-dogëve, por hamburgerët janë zgjedhja më e mirë për shëndetin e zemrës”, ka thënë Burak.

Sipas saj, hamburgerët janë më pak të përpunuar dhe ofrojnë proteina me cilësi më të lartë, si dhe më shumë lëndë ushqyese si hekuri, vitamina B12 dhe zinku.

Si ta bëni një festë më të shëndetshme me grill?

Dietologët rekomandojnë:

Të zëvendësoni mishin e kuq me mish pule, gjeli, peshk ose burgerë me bazë bimore.
Të shtoni më shumë perime si marule, domate, qepë dhe avokado.
Të kufizoni salcat e pasura me kripë, yndyrë dhe sheqer.
Të konsumoni më shumë fruta dhe perime të pjekura në skarë.
Të zgjidhni ujë, çaj pa sheqer ose pije të tjera me pak sheqer.
Të kontrolloni madhësinë e porcioneve.

“Nuk është një festë e vetme me grill që do të përcaktojë shëndetin tuaj. Ajo që ka më shumë rëndësi është mënyra se si ushqeheni shumicën e kohës”, ka përfunduar Burak.