Gjigandi francez i modës “Chloe” ka publikuar fotografitë e para me veshjet që ka krijuar në bashkëpunim me brendin e aktores së famshme Angelina Jolie, “Atelier Jolie”, raportuan revistat e modës, Vogue dhe InStyle.
Si pjesë e njoftimeve për punën e tyre gjatë muajit tetor, shtëpia franceze e modës ka shpalosur disa sekuenca nga fushata e re e marketingut e realizuar nga fotografja amerikane Zoë Ghertner. Në fotografi shihet një fustan me ngjyrë krem të lehtë nga mëndafshi dhe një pelerinë opere e zezë.
Në faqen e “Chloe” gjithashtu janë publikuar imazhe të veshjeve në tërësi. Ato pritet të dalin në shitje në janar të vitit 2024 në dyqanet e brendit “Chloe”, e gjithashtu edhe online në faqen e tyre zyrtare.
“Chloe” ka njoftuar se koleksionin e karakterizojnë siluetat femërore, qëllimi i të cilave thuhet se është t’i “festojnë” lidhjet në mes të grave.
Në këtë njoftim gjithashtu thuhet se koleksioni i Joliet përbëhet nga materiale natyrale si mëndafshi organik, e gjithashtu edhe leshi i certifikuar.
Edhe
“Atelier Jolie” marka e re që do të punësojë refugjatë
Bashkëpunimi në mes të aktores dhe shtëpisë së modës fokusohet kryesisht në ambient dhe ka për qëllim të ulë ndotjen e tij.
“Chloe” ka certifikatën “B Corp”, që në SHBA u jepet kompanive që pjesë të performancës së tyre i bëjnë çështjet që kanë të bëjnë me mjedisin dhe ato sociale.
Për ta punuar koleksionin ata rekrutuan artizan nga “Akanjo”, një ndërmarrje sociale e Organizatës Botërore të Tregtisë së Ndershme, me qendër në Madagaskar ku trajnohen dhe promovohen zejtarët.
Kjo është bërë për të nxitur përfshirjen e artizanëve refugjatë dhe migrantë, ka raportuar revista “InStyle”.
Për këtë koleksion Jolie kishte thënë se do të përmbajë kryesisht ngjyra e nuanca të lëkurës si krem dhe neutrale.
Edhe
Angelina Jolie po krijon brend të veshjeve dhe stolive
Më parë Jolie kishte treguar se si e bija e kishte nxitur të shikonte më thellë në ngjyrat neutrale të toneve të lëkurës së njeriut.
“Nuk më ka shkuar kurrë në mendje deri sa dolëm për blerje bashkë dhe e pashë se ka shumë vend për përmirësime”, ka thënë Jolie për revistën “Vogue”.
