Policia dështon ta çojë në Gjykatë deputeten Fitore Pacolli

Ka dështuar të mbahet seanca për hedhjen e gazit lotsjellës në Kuvendin e Kosovës në mars të vitit 2018, në mungesë të të akuzuarës Fitore Pacolli-Dalipi. Sipas gjyqtarit të rastit, gjykata ka lëshuar urdhëresë për sjellje me detyrim, mirëpo shërbimi policor nuk e ka realizuar kërkesën, sipas tij. E akuzuara Fitore Pacolli-Dalipi, ka mohuar se ka marrë ftesë nga Gjykata. Në seancë, të pranishëm ishin tre të akuzuarit e tjerë

Në mungesë të deputetes së Vetëvendosjes, Fitore Pacolli-Dalipi, të mërkurën ka dështuar të mbahet seanca për hedhjen e gazit lotsjellës në Kuvend në mars të vitit 2018.

Pos Pacolli-Dalipit, për hedhje të gazit lotsjellës akuzohen edhe ministri në detyrë i Punëve të Brendshme, Xhelal Sveçla, deputeti Salih Zyba dhe ish-deputetja Drita Millaku.

Për të akuzuarën Fitore Pacolli Dalipi, gjyqtari Sabit Sadikaj tha se gjykata ka lëshuar urdhëresë për sjellje me detyrim, mirëpo sipas tij, shërbimi policor nuk e ka realizuar kërkesën. 

Gjyqtari Sadikaj theksoi se urdhëresa do të përsëritet dhe do të shqyrtohet mundësia e urdhërarrestit apo paraburgimit.

Për këtë, ka reaguar deputetja Pacolli Dalipi, duke mohuar se ka marrë ftesë nga Gjykata për pjesëmarrje në seancë.

“Gjykata e ka adresën time të banimit dhe e di saktësisht ku banoj. Nëse vërtet kanë dërguar një ftesë dhe nuk më kanë gjetur në shtëpi, është obligim ligjor i shërbimit policor apo postës që të lënë një njoftim për praninë e tyre, qoftë për të caktuar një datë tjetër, qoftë për të më njoftuar që të paraqitem në gjykatë”, ka theksuar ajo.

Edhe Arbëri 10 pri 2026 Shtyhet seanca për gazin lotsjellës ndaj Fitore Pacollit, Salih Zybës dhe Drita Millakut

Tre të akuzuarit e tjerë u paraqitën në seancë.

Gjykata Themelore në Prishtinë më 6 qershor 2024 ka konfirmuar aktakuzën ndaj Xhelal Sveçlës, Drita Millakut, Salih Zybës dhe Fitore Pacolli-Dalipit, për hedhjen e gazit lotsjellës në Kuvend. Atë e vërtetoi më pas Gjykata e Apelit.

Sipas aktakuzës, Sveçla, Millaku, Zyba dhe Pacolli-Dalipi më 21 mars 2018, nga ora 12:10 e deri më 15:40, kanë ndezur disa bombola të gazit lotsjellës brenda sallës së Kuvendit të Kosovës, ku po mbahej seancë plenare.