Komisioni shqyrtoi Projektligjin për tekste mësimore, opozita thotë se u miratua pa kuorum

Komisioni parlamentar për Arsim ka shqyrtuar Projektligjin për tekste shkollore, për të cilin deputetët opozitarë thonë se është miratuar në lexim të parë pa pasur kuorum. Kryetari i Komisionit për Arsim dhe ministrja e Arsimit arsyetuan vijimin e procedurës deri në miratimin final të Projektligjit

Deputetët e partisë në pushtet kanë miratuar në Komisionin për arsim 11 amendamente të Projektligjit për tekste shkollore, votimin e të cilit në lexim të parë opozita e ka quajtur të jashtëligjshëm.

Sipas ligjvënësve të partive në opozitë, në seancën plenare të 7 marsit, projektligji është miratuar në parim pa qenë kuorumi i mjaftueshëm në sallë. Shkaku i kësaj, të premten ata e bojkotuan mbledhjen e Komisionit parlamentar ku është shqyrtuar ky projektligji.

Por, kryetari i Komisionit, Ardian Gola, tha se forumi që e drejton nuk ka kompetencë për të ndalur procedimin e Projektligjit, përderisa kryetari i Kuvendit e ka konstatuar miratimin e tij në parim.

“Nëse ka diçka kontestuese ashtu siç po ngrihet edhe nga opozita, atëherë është pikërisht Komisioni për Legjislacion, për Mandate dhe për Rregulloren e Kuvendit ai i cili e ka për mandat për të interpretuar një rast specifik nëse është shkelur rregullorja ose jo. Kështu që ne si komision nuk guxojmë ta ndalim automatizimin e kësaj procedure”, ka deklaruar Gola. 

E ministrja e Arsimit, Arbërie Nagavci, tha se mbështetja e këtij projektligji është në interes të përgjithshëm pasi, sipas saj, dokumenti do të sjellë cilësi në arsim. Edhe ajo mohoi pretendimet e opozitës përkitazi me ligjshmërinë e procedurës së votimit të projektligjit në lexim të parë.

Edhe Arbëri 13 tet 2026 Komisionet parlamentare nisin punën, kthehen tensionet

“Nuk ka asnjë dyshim që tekstet kanë nevojë të përmirësohen dhe PDK-ja apo kushdo çoftë tjetër që synon të punojë për të mirën e fëmijëve tanë, do të duhej  të paraqesin argumente e jo shpifje. Ajo çka ne kemi bërë me këtë ligj është që si Qeveri kemi arritur që të finalizojmë një ligj që për së paku dhjetë vjet, të gjitha qeveritë e kanë nisur si punë e nuk e kanë finalizuar asnjë herë. Është më mirë që të na tregojnë cilat janë arsyet e tyre, cilat janë arsyet konkrete dhe jo të pengojnë punën në interes të së mirës së përgjithshme”, është shprehur Nagavci. 

Përveç opozitës, çështjen e ligjshmërisë së votimit e kanë kontestuar edhe deputetët e pushtetit, Visar Korenica dhe Eman Rrahmani.