Von Cramon e cilëson gabim strategjik të Kosovës ikjen e “Sunny Hillit”

Raportuesja për Kosovën në Parlamentin Evropian, Viola von Cramon, e ka quajtur gabim strategjik të Kosovës dështimin e organizimit të festivalit “Sunny Hill” në Prishtinë dhe zhvendosjen e tij në Tiranë për edicionin e tretë.

Në një shkrim në Twitter ajo ka thënë se “Qeveria e Kosovës është dashur të siguronte që ‘Sunny Hill’ të mbahej në Prishtinë dhe shpresoj se do të kthehet”.

“Jam shumë e mërzitur që ‘Sunny Hill’ s’do të mbahet në Prishtinë këtë verë. Është gabim strategjik pasi sillte njerëz në Kosovë dhe promovonte rininë e saj”, ka thënë ajo.

Të martën, organizatorët bënë të ditur lajmin për zhvendosjen e festivalit më të madh drejt Tiranës. Arsyetim përmendën “vonesat në dhënien e lejes për shfrytëzim të pronës që ia lëshoi Komuna e Prishtinës në Bërnicë të Poshtme”. Nga Komuna e Prishtinës akuzuan Ministrinë e Administrimit të Pushtetit Lokal për vonesa, ndërsa kjo ministri akuzoi komunën për mosdorëzim të të gjitha dokumenteve esenciale.