Sot Kosova është zgjuar me një lajm të hidhur. Në moshën 84-vjeçare ka ndërruar jetë profesori dhe intelektuali i shquar, Abdullah Karjagdiu, thuhet në njoftimin që familja ua ka dërguar mediave.
I ndjeri ka lindur më 24.12.1936. Ishte ndër profesorët e parë universitarë të gjuhës dhe letërsisë angleze, doajen dhe korife i letërsisë angleze dhe amerikane, autor i dhjetëra veprave universitare, përkthyes i shumë kryeveprave letrare dhe ndër profesorët dhe veprimtarët politikë më të spikatur dhe më aktivë për shumë gjenerata. Ka qenë bashkëpunëtor i ngushte i Ibrahim Rugovës dhe Adem Demaçit.
Gjate karrierës së tij të begatë dhe të larmishme i ka ushtruar edhe funksionet në vijim: Shef i Departamentit të Anglishtes, prodekan dhe dekan i Fakultetit të Filologjisë, Nënkryetar i Partisë Shqiptare Demokristiane dhe i Partisë Parlamentare, Kryetar i Shoqatës së Shekspirologëve dhe i Shoqatës së Përkthyesve, Drejtor i Institutit të Gjuhëve të Huaja, e të tjera. Siç shkruhet në njoftim, ai ka qenë një ndër intelektualët, studiuesit, profesorët dhe veprimtarët më të dalluar.
“Kontributi i tij i pashoq për zhvillimin e arsimit dhe për çështjen kombëtare do të mbahet mend dhe do të shërbejë si motivim për gjeneratat në vijim. I ndjeri ka ndërruar jetë pas një sëmundjeje të gjatë në mesin e më të dashurve”, shkruhet në njoftim.
Varrimi i të ndjerit është bërë të shtunën në varrezat e Prishtinës, në “Dragodan”, në orën 13:30.