Pas inspektimit të objekteve të Teatrit Kombëtar dhe Bibliotekës Kombëtare ku është parë për problemet që kanë këto dy institucione, Ministri i Kulturës, Rinisë dhe Sportit, ka takuar sot Kryeshefin Ekzekutiv të Kompanisë së Ujësjellësit Rajonal “Prishtina”, Ilir Abdullahu.
Në takim, siç njofton kumtesa nga kjo ministri, u diskutua për problemet e fundit me të cilat janë përballur dy institucionet e kulturës. Gashi e Abdullahu u dakorduan për të koordinuar veprimet për eliminimin e problemeve që kanë këto dy institucionet në objektet e tyre.
“Dua të shfrytëzoj rastin t’u falënderoj për intervenimin e shpejtë që keni bërë në eliminimin e ujërave gjatë ditës së sotme”, tha Gashi.
Ai kërkoi nga drejtuesit e kompanisë së ujësjellësit që bashkërisht të zhvillojnë një projekt për eliminimin e rrezikut që shkakton depërtimi i ujërave në këto dy institucione kombëtare të kulturës, me ç’rast të dy u dakorduan të harmonizojnë veprimet.
“Ministria e Kulturës, Rinisë dhe Sportit mbetet e përkushtuar që të ndajë buxhet shtesë për zgjidhjen e kësaj problematike”, u shpreh mes tjerash Gashi.
Edhe
Gashi premton zgjidhje për ujërat e zeza në Teatër e Bibliotekë Kombëtare
Ndërsa, kryeshefi i kompanisë, Ilir Abdullahu, shfaqi gatishmërinë dhe mbështetjen e plotë të Ujësjellësit Rajonal “Prishtina” që bashkërisht me institucionet, ministrinë dhe komunën t’i koordinojnë veprimet dhe të sanojnë gjendjen e tanishme.
Palët gjithashtu presin veprime konkrete edhe nga ana e Komunës së Prishtinës që të bashkëpunojë për zgjidhjen e këtyre problemeve.
