Ministria do të rishqyrtojë blerjen e veprave të artit

Me kritika për përbërjen e jurive vlerësuese, çmimet me të cilat janë paguar veprat e procesin në përgjithësi, rreth 20 artistë kanë protestuar të enjten, para Ministrisë së Kulturës.

Kanë kërkuar rishqyrtimin e procesit nëpërmjet të cilit shteti me 247 mijë euro bleu vepra arti nga 68 artistë. Protestuesit u diskualifikuan nga thirrja publike. Por, sipas tyre, në proces janë bërë disa shkelje. Kanë akuzuar disa anëtarë të jurisë për favorizim të njerëzve të afërt.

Ministri i Kulturës, Hajrulla Çeku, në takim me artistët është zotuar se çështjet e ngritura do të sqarohen.

Nëpërmjet pakos për ringjallje ekonomike Ministria e Kulturës ka paguar deri në 7 mijë euro për piktura e fotografi. Janë çmime joreale për tregun e veprave të artit pamor.