Limaj tha se Buja u kthye në shtëpi të vet

Fundi i javës që vjen do t’i sjellë institucionet e reja për vendin, ka deklaruar lideri i Nismës, Fatmir Limaj. Ai këto deklarime i bëri gjatë zyrtarizimit te Nisma të ish-deputetit e ish-kryetarit të komunës së Lipjanit, Shukri Buja. Buja tha se pavarësisht që janë në koalicion me PDK-në, janë konkurrentë.

Derisa seanca themeltare e Kuvendit të Kosovës është caktuar për të enjten e javës që vjen, lideri i Nismës, Fatmir Limaj, është shfaqur i bindur se Kosova do t’i ketë institucionet e reja, transmeton KTV.

Pavarësisht që janë në një koalicion me PDK-në, gara mes Nismës e PDK-së nuk është ndalur.

Kësaj here, në partinë e Limajt ka aderuar një ish-deputet e ish-kryetar komune i PDK-së.

Shukri Buja, i cili nuk arriti të bëhej pjesë e listës së deputetëve nga PDK-ja, zyrtarisht i është bashkuar Nismës.

Ish-kryetari i Lipjanit, me aktakuzë për korrupsion e keqpërdorim të detyrës zyrtare, thotë se nga PDK-ja doli meqë iu mbyllen shtigjet, e një shteg të hapur e gjeti te ish-bashkëluftëtarët e tij.

Lideri i tij i ri, Fatmir Limaj, tha se Buja u kthye në shtëpinë e tij.

Limaj e quajti ditë feste për Nismën, derisa tha se partia është forcuar shumë.

Buja nuk ka dashur të merrej shumë me ish-partinë, por ia ka kujtuar se tash janë konkurrentë, pavarësisht se janë në një koalicion.

Ish-kryetari i Lipjanit, Shukri Buja, ishte dënuar me 4 muaj burg me kusht e 2 mijë euro gjobë për fshehje të pasurisë në fundin e 2015-ës.

Në shkurtin e 2017-ës, Prokuroria Speciale e Kosovës pati ngritur aktakuzë për veprat penale të korrupsionit, keqpërdorimit të detyrës zyrtare e marrje të ryshfetit.

Ai, bashkë me 9 të tjerë, dyshohet se kanë nxjerrë vendime, me të cilat fillimisht kanë eksproprijuar dhe më pas kanë tjetërsuar pronat shoqërore dhe pronat komunale, me qëllim të eksploatimit të xehes së nikelit.