Policia kufitare e Kosovës ka ndaluar dy kamionë duke tentuar të kontrabandonin kafshë.
Të mërkurën në fshatin Ramijan, komuna e Vitisë, është identifikuar kamioni me targa të Kosovës i drejtuar nga i dyshuari H. K.
Në kamionin e tij janë gjetur dhjetëra dele për të cilat nuk posedonte dokumentacion përkatës.
“Gjatë kontrollit zyrtarët policorë kanë vërejtur se i dyshuari në rimorkio kishte të ngarkuar 57 krerë dele për të cilat nuk posedonte kurrfarë dokumenti përkatës”, thuhet në njoftimin e PK-së.
Kurse, në rrugën Viti-Pozhoran, komuna e Vitisë, është identifikuar edhe një kamion tjetër, që drejtohej nga i dyshuari M. B.
Në kamion janë gjetur gjashtë lopë për të cilat nuk kishte dokumente përkatëse.
“Kafshët dyshohet të jenë futur në territorin e Republikës së Kosovës përmes rrugëve ilegale nga Republika e Maqedonisë se veriut”, njoftoi Policia.
