Dy policë kanë pësuar lëndime gjatë ndjekjes së një veture natën e 7 shkurtit, që nga zona e Obiliqit e deri në veri të Kosovës, në rrugën Mitrovicë-Zubin Potok.
Nëpërmjet një njoftimi, Policia e Kosovës ka detajuar rastin duke treguar se drejtuesi fillimisht nuk u është ndalur sinjalizimeve të policëve në zonën e Obiliqit dhe ka rrezikuar një zyrtar policor. Pavarësisht tentimit të Policisë, shoferi ka vazhduar lëvizjen në drejtim të Vushtrrisë e më pas në Mitrovicë.
Policia ka bërë të ditur se e ka ndjekur veturën e dyshimtë edhe me njësitet e Mitrovicës së Jugut.
Gjatë ikjes, drejtuesi i automjetit ka rrezikuar vazhdimisht pjesëmarrësit e tjerë në trafik, sipas njoftimit të Policisë.
Njoftimi thekson se vetëm në Mitrovicë, kjo veturë ka goditur tri herë veturën policore që po e ndiqte.
Vetura u arrit të ndalej vetëm në fshatin Zupç, në rrugën Mitrovicë-Zubin Potok. Aty është arrestuar shoferi dhe tre pasagjerët.
“Falë shkathtësisë dhe profesionalizmit të zyrtarëve policorë, të cilët kanë vepruar me qetësi, vetëpërmbajtje dhe maturi, duke shfrytëzuar një lokacion të përshtatshëm pa rrezikuar pjesëmarrësit e tjerë në trafik, në rrugën nacionale Mitrovicë – Zubin Potok, përkatësisht në segmentin rrugor në fshatin Zupç, kanë arritur ta ndalojnë automjetin dhe të arrestojnë shoferin dhe tre pasagjerët”, thuhet në njoftim.
Sipas njoftimit, shoferit iu caktua masa e ndalimit policor, ndërsa po hetohet për “sulm ndaj personit zyrtar në kryerje të detyrës zyrtare”.