Një 15-vjeçare vdiq pasi ra nga kati i katërt në Ferizaj, një tjetër në gjendje të rëndë

Një 15-vjeçare ka vdekur e një 18-vjeçare ka marrë lëndime të rënda, pasi kanë rënë nga kati i katërt i një objekti banesor në rrugën “Sandër Prosi” të Ferizajt të shtunën në mbrëmje, ka konfirmuar Policia e Kosovës.

Siç ka bërë të ditur zëdhënësi i Policisë për rajonin e Ferizajt, Kanun Veseli, rasti është raportuar në Polici pas orës 21:00.

Ai ka konfirmuar për KOHËN se fillimisht dy vajzat janë dërguar për ndihmë mjekësore në Qendrën Emergjente në Ferizaj e më pas, në gjendje të rëndë shëndetësore, janë dërguar për në Qendrën Klinike Universitare të Kosovës në Prishtinë. Si pasojë e plagëve të rënda ka humbur jetën Z.M. e moshës rreth 15-vjeçare, ndërsa e lënduar ka mbetur A.M. e moshës rreth 18-vjeçare.

“Policia Rajonale e Ferizajt, hetuesit dhe krimteknikët rajonalë janë në vendin e ngjarjes dhe nën autorizim të prokurorit kujdestar nga Prokuroria Themelore e Ferizajt po e hetojnë rastin”, ka thënë Veseli.