Dy të lënduar në aksidentin mes kamionëve në rrugën Gjilan–Kamenicë

Të paktën dy persona kanë mbetur të lënduar si pasojë e një aksidenti të ndodhur mes dy kamionëve gjatë mesditës të së mërkurës në rrugën Gjilan-Kamenicë.

Policia ka njoftuar se të lënduar kanë mbetur dy drejtuesit e kamionëve, të cilët janë dërguar për trajtim në Qendrën Emergjente në Gjilan. 

Zëdhënësi i Policisë për rajonin e Gjilanit, Valon Osmani, ka thënë për KOHËN se pas aksidentit, njëra korsi e rrugës është bllokuar për qarkullim.

“Sot rreth orës 12:24 në aksin rrugor Gjilan–Kamenicë ka ndodhur një aksident trafiku ku janë përfshirë dy kamionë. Si pasojë e aksidentit, përveç dëmeve materiale, lëndime trupore kanë pësuar dy ngasësit, të cilët janë dërguar në Qendrën Emergjente në Gjilan për trajtim mjekësor”, ka thënë ai. 

Në vendin e ngjarjes kanë dalë njësitë policore dhe ekipet relevante, të cilat janë duke punuar për lirimin e rrugës dhe normalizimin e trafikut.