Prokuroria ka njoftuar se prokurori, Beqë Shala, i arrestuar nën dyshimin se ka kryer veprën penale marrje ryshfeti është ndaluar për 48 orë.
Në njoftim thuhet se hetuesit policorë kanë kryer bastisje në zyrën e punës dhe në vendbanimin e të dyshuarit.
“Gjatë bastisjes janë sekuestruar prova materiale që do të shërbejnë gjatë procedurës hetimore penale”, thuhet në njoftim.
Prokuroria Speciale, thuhet se brenda afatit ligjor të përcaktuar në Kodin e Procedurës Penale do të parashtrojë kërkesë për caktimin e masës së paraburgimit ndaj të dyshuarit.
Arrestohet një prokuror në Prizren për ryshfet
Prokurori i Prokurorisë Themelore në Prizren, Beqë Shala, është arrestuar nën dyshimin se ka marrë ryshfet.
Sipas njoftimit nga Sistemi Prokurorial i Kosovës, Shala është arrestuar në vendin e punës.
“Me urdhër të Prokurorisë Speciale të Republikës së Kosovës, hetuesit policorë nga Drejtoria për Hetimin e Krimit të Organizuar dhe Krimeve të Rënda në Policinë e Kosovës, në bashkëpunim me Kryeprokurorin e Prokurorisë Themelore në Prizren kanë arrestuar B.Sh nën dyshimin se ka kryer veprën penale ‘Marrja e ryshfetit’. I dyshuari B.Sh., prokuror në Prokurorinë Themelore të Prizrenit, është arrestuar në vendin e punës”, thuhet në njoftim.
Betimi për Drejtësi ka shkruar se arrestimi i Shalës ka ndodhur gjatë zhvillimit të një hulumtimi nga kjo media, që thuhet se posedon një video-incizim të prokurorit duke pranuar ryshfet.
VIDEO: Momenti i arresitmit
Prokuroria Speciale së bashku me Policinë e Kosovës, ka njoftuar se është duke ndërmarrë të gjitha veprimet e nevojshme hetimore, në përputhje me Kodin e Procedurës Penale dhe ligjet në fuqi.
