Të dielën do të luhet xhiroja e fundit, përkatësisht e 38-a në Premier League. Të gjitha ndeshjet luhen nga ora 17:00.
Kampioni u caktua shumë më herët e po ashtu tri skuadrat që bien në Championship.
Por gara për të zënë një pozitë që dërgon në Ligën e Kampionëve në edicionin e ardhshëm vazhdon të jetë e hapur.
Liverpooli si kampion dhe Arsenali tashmë janë kualifikuar, njëjtë si Tottenhami, si fitues i Ligës së Evropës. Për tri pozita të tjera në garë janë pesë skuadra: Manchester City, Newcastle, Chelsea, Aston Villa dhe Nottingham Foresti.
Liverpooli udhëheq në tabelë me 83 pikë. Arsenali është i dyti me 71 pikë, ndërsa Manchester City i ka 68. Pasojnë Newcastle, Chelsea dhe Villa me nga 66 pikë dhe Nottinghami me 65.
Pesë të parët në tabelë luajnë në Champions edicionin e ardhshëm.
Kryendeshja e xhiros së fundit luhet ndërmjet Nottinghamit dhe Chelseat.
Kjo do të jetë ndeshja e 100-të mes këtyre skuadrave.
Chelsea ka 51 fitore, Nottinghami 27 dhe 31 ndeshje kanë përfunduar baras.
Nëse Nottinghami e siguron Championsin do të ishte sukses shumë i madh për skuadrën e Nuno Espirito Santos.
Ndeshje tjetër interesante do të jetë ajo ndërmjet Manchester Unitedit dhe Aston Villas.
Manchester City luan në udhëtim ndaj Fulhamit, ndërsa Newcastle e pret Evertonin.
