Neymar nuk ka hequr dorë nga shpresa për t’u përfshirë në ekipin e Brazilit për Kupën e Botës këtë verë, ndonëse u la jashtë për ndeshjet miqësore të këtij muaji kundër Francës dhe Kroacisë.
Përzgjedhësi Carlo Ancelotti të hënën publikoi listën e lojtarëve për ndeshjet miqësore.
34-vjeçari nuk fshehu zhgënjimin e tij pasi u la jashtë listës nga Ancelotti.
“Sigurisht që jam i mërzitur dhe i dëshpëruar që nuk jam përzgjedhur. Por fokusi mbetet i njëjtë, ditë pas dite, përgatitje dhe ndeshje pas ndeshje. Do të arrijmë qëllimin tonë. Ka mbetur edhe një njoftim përfundimtar i skuadrës dhe ëndrra vazhdon. Kaq është, jemi në këtë së bashku”, ka thënë Neymar.
Ai ka falënderuar të gjithë për mbështetjen.
Neymar nuk është paraqitur për Brazilin që nga tetori i vitit 2023. Trajneri italian nuk ia ka mbyllur përfundimisht derën brazilianit të Santosit.
