-
Nga:
Arsim Maxhera
- 4 shtator 2025 09:47
- Shpërndaje në:
Në “Veritas Stadion” në Turku, Kosova e ka luajtur ndeshjen e parë kualifikuese për Kampionat Botëror. Për Kosovën ishte edhe ndeshja e parë garuese në përgjithësi.
Finlandë – Kosovë ishte luajtur më 5 shtator 2016, në praninë e 7571 shikuesve. Ndeshja kishte përfunduar 1:1.
Saktësisht nëntë vjet më vonë, të premten, Kosova e nis rrugëtimin e ri në kualifikimet e Botërorit. Sërish në grup shumë sfidues, por me shpresa për kualifikim në Botërorin që mbahet vitin e ardhshëm në SHBA, Meksikë e Kanada.
Optimizëm për kualifikim kishte edhe nëntë vjet më parë. Sidomos pas barazimit me Finlandën në udhëtim në ndeshjen e parë.
Por gjatë kualifikimeve e sidomos pas tyre, u kuptua se Botërori ishte një ëndërr, atëherë e largët, për Kosovën.
Organizimi në përfaqësuese e rreth saj, nuk ishte as për së afërmi ai i kërkuar për kualifikim në ngjarjen më të madhe të futbollit. Konkurrenca në ekip po ashtu nuk ishte e duhura, njëjtë si disiplina. Kishte rrethana të tjera rënduese po ashtu.
Dhe pika e fituar ndaj Finlandës mbeti e vetmja. Kosova në kualifikimet për Kupën e Botës 2018 i zhvilloi plot dhjetë ndeshje. Tani i ka vetëm gjashtë.
Pas barazimit me Finlandën, Kosova i humbi të gjitha nëntë ndeshjet. Paraqitjet e mira ishin të kohëpaskohshme, por pa rezultat. Pa pikë të fituara.
Më 6 tetor 2016, erdhi goditja që e ktheu përfaqësuesen në realitet. Kroacia fitoi 6:0 në Shkodër. Pasoi humbja 3:0 nga Ukraina, 2:0 nga Turqia e humbjet e tjera. Nëntë rresht.
Grupin e fitoi Islanda me 22 pikë. 20 pikë i mblodhi Kroacia që u kualifikua në plejof, e më pas në Botëror e më pas shkoi deri në finale.
Ukraina u rendit e treta me 17 pikë, Turqia i kishte 15 e Finlanda nëntë. Kosova një.
Prej lojtarëve që startuan ndaj Finlandës, në përfaqësuese janë ende Amir Rrahmani, Leart Paçarada, Valon Berisha e Milot Rashica. Por Rashica mungon në ndeshjet e këtij muaji. Vedat Muriqi ishte vetëm rezervist në atë ndeshje.
Të pasuksesshme për Kosovën ishin edhe kualifikimet për Kupën e Botës 2022. Sërish ishte vetëm e fundit. Prej tetë ndeshjeve mblodhi pesë pikë, dy më pak se Gjeorgjia. Spanja e fitoi atë grup, ndërsa Suedia si e dyta vazhdoi në plejof. Spanja i kishte 19 pikë e Suedia 15. Me 10 pikë fushatën kualifikuese e përfundoi Greqia e pas saj ishte Gjeorgjia.
Në ndeshjen e parë, më 28 mars 2021, Kosova u mposht 3:0 nga Suedia në “Fadil Vokrri”. Transferimi më i madh i verës, Alexander Isak, kishte shënuar njërin nga golat. Për shkak të pandemisë ajo ndeshje ishte luajtur pa shikues.
Menjëherë më 31 mars 2021, Kosova ishte mposhtur 3:1 nga Spanja në Sevilla.
Fitorja e parë dhe e vetmja deri më tani në kualifikime për Botëror ishte ajo ndaj Gjeorgjisë, më 2 shtator 2021. Në Batumi, golin për fitoren 1:0 e kishte shënuar Vedat Muriqi.
Muriqi kishte shënuar edhe për barazimin 1:1 me Greqinë më 5 shtator 2021, ndërsa pikë tjetër ishte fituar ndaj Greqisë në udhëtim. Por sërish me pesë pikë Kosova ishte shumë, shumë larg ëndrrës për kualifikim në Botëror.
Në kualifikimet e treta për Botëror, Kosova është në grup me Zvicrën, Suedinë e Slloveninë. Sipas ndarjeve të bëra në vazo, Kosova është autsajdere e grupit. Megjithatë ka shpresë për kampanjë të suksesshme e te disa edhe për kualifikim në Botëror. Organizimi në përfaqësuese e rreth saj vlerësohet dukshëm më i mirë. Grupi i lojtarëve vlerësohet i konsoliduar, shtabi teknik me përvojë e konkurrenca e mirë. Selektori Franco Foda nuk i ka kushtuar shumë rëndësi mungesave. Edon Zhegrova, Milot Rashica, Florent Hadërgjonaj, Emir Sahiti janë prej lojtarëve që mungojnë.
“Kemi treguar se jemi të aftë për të përballuar të gjitha mungesat. Kemi krijuar ekip shumë të mirë. Dhe jemi shumë optimistë se në ndeshjet e radhës edhe me mungesa të tilla do t’ia dalim”, ka thënë Foda në konferencën e parë në këtë grumbullim.
Testi i vërtetë për “Dardanët” do të jetë ndeshja e së premtes me Zvicrën. Testi i dytë është menjëherë të hënën ndaj Suedisë. Dhe më 18 nëntor, kur luhet ndeshja tjetër me Zvicrën dhe e fundit e këtyre kualifikimeve, do të dihet nëse fushata ishte e suksesshme apo sërish synimet e ëndrrat nuk ishin në përputhje me forcën reale.