Xhiroja e tretë e Premier Leagues pritet të ofrojë ndeshje shumë interesante. Liverpool – Arsenal vlerësohet të jetë derbi i javës së tretë i elitës angleze të futbollit. Kjo ndeshje luhet të dielën nga ora 17:30 në “Anfield”.
Të dyja skuadrat e kanë nisur mbarë edicionin 2025/26. Liverpooli është kampion në fuqi i Anglisë.
“Të kuqtë” në ndeshjen hapëse të sezonit e mposhtën Bournemouthin në shtëpi me rezultatin 4:2. Në xhiron e dytë triumfuan në udhëtim ndaj Newcastle Unitedit me rezultatin 3:2.
Ndërkohë edhe Arsenali i ka fituar dy ndeshjet e para. Në xhiron e parë fitoi në udhëtim te Manchester Unitedi me rezultatin 1:0 kurse në javën e dytë e mposhti në shtëpi Leeds Unitedin me rezultatin e thellë, 5:0.
Liverpooli nuk ka fituar në gjashtë takimet e fundit në Premier League kundër “Topçinjve”. Ka katër barazime dhe dy humbje.
Arsenali, që për trajner e ka Mikel Artetan, nuk ka fituar në 12 ndeshjet e fundit në “Anfield”, përkatësisht që nga shtatori i vitit 2012.
Katër ndeshjet e fundit midis Liverpoolit dhe Arsenalit në “Anfield”, duke llogaritur të gjitha garat, janë mbyllur me barazim.
Liverpooli, që drejtohet nga trajneri Arne Slot, ka shënuar në 22 nga 23 ndeshjet e fundit në ligë kundër Arsenalit.
Në total mes dy skuadrave të mëdha angleze janë zhvilluar 235 ndeshje. Liverpooli prin me 89 fitore, Arsenali ka 81, kurse 65 herë ndeshja ka përfunduar baras.
Të dielën luhen edhe tri ndeshje tjera.
Manchester City nga ora 15:00 luan si mysafir i Brightonit. Të shtunën do të luhen gjashtë ndeshje.
Xhiroja e tretë fillon me ndeshjen që luhet ndërmjet Chelseat dhe Fulhamit, nga ora 13:30.
Manchester Unitedi luan në shtëpi nga ora 16:00 me Burnleyn.
Nga ora 16:00 takohet edhe Sunderlandi i Granit Xhakës me Brentfordin dhe Tottenham Hotspuri me Bournemouthin.