Fisnik Asllani e Albion Rrahmani po kalojnë formë të mirë te skuadrat e tyre. Por nuk ka dilema që sulmuesi kryesor i Kosovës mbetet Vedat Muriqi.
Muriqi pritet të jetë lojtari kryesor në sulm edhe në kualifikimet për Kupën e Botës 2026. E si mund të jetë ndryshe kur Muriqi shënon shpesh ndaj klubit më të madh në botë, Real Madridit?
Këtë 31-vjeçari e bëri edhe të shtunën mbrëma. E kaloi në epërsi Mallorcan ndaj Real Madridit në “Santiago Bernabeu”, me golin e shënuar në minutën e 18-të. Prizrenasi shënoi pas një rivënie nga këndi. Real Madridi megjithatë fitoi 2:1, ndërkohë që iu anuluan edhe tre gola. Anulimi i dy golave të Kylian Mbappes dhe sidomos ai i Arda Gulerit për lojë me dorë, morën gjithë vëmendjen nga ndeshja në Madrid.
Por për tifozët e Kosovës lajmi më i mirë është goli i Muriqit. Ai u shënua në një moment shumë të rëndësishëm, në prag të fillimit të kampanjës kualifikuese të Kosovës për Kupën e Botës 2026.
Përfaqësuesja e Kosovës grumbullohet të hënën, ndërsa të premten luan në Basel ndaj Zvicrës. Menjëherë më 8 shtator në “Fadil Vokrri” është ndeshja Kosovë – Suedi.
Janë dy ndeshje shumë të vështira për “Dardanët”, por forma e Muriqit dhe disa lojtarëve të tjerë jep shpresë.
“Vedati po vinte nga pezullimi dhe bëri një ndeshje të shkëlqyer. E pashë që dukej i mprehtë pas ndërprerjeve”, ka thënë trajneri i Mallorcas, Jagoba Arrasate.
Mprehtësia e Muriqit është e domosdoshme për Kosovën. Loja në sulm e përfaqësueses deri më tani ka shkuar kryesisht përmes tij. Dhe kjo nuk pritet të ndryshojë.
Muriqi nuk e nisi në mënyrën më të mirë edicionin në La Liga, ndërsa javë më parë e vazhdoi qëndrimin te Mallorca. Në ndeshjen hapëse, në një moment të pafat, goditi në fytyrë portierin e Barcelonës dhe u ndëshkua direkt me të kuq. Luajti vetëm 39 minuta. Për këtë arsye mungoi në ndeshjen e dytë ndaj Celta Vigos. Por u kthye me gol ndaj Real Madridit.
Tani grumbullohet me Kosovën, me shpresë për rezultate pozitive ndaj dy kundërshtareve shumë të forta.
Në ndeshjen e fundit me Kosovën, ndaj Islandës më 23 mars, në plejofin e Ligës së Kombeve, Muriqi realizoi “hat-trick”. U pushua në ndeshjet e qershorit, ndërsa dy gola i kishte shënuar në shtator të vitit të kaluar ndaj Qipros. Në shtator 2023 kishte shënuar po ashtu dy gola në barazimin 2:2 me Zvicrën në Prishtinë.
Me plot 31 gola në 60 ndeshje, “pirati” është bindshëm golashënuesi më i mirë i Kosovës. I dyti në listë është Milot Rashica me 12 gola në 61 ndeshje. Të tjetët i kanë më pak se dhjetë gola.
Kosova tashmë ka konkurrencë edhe për vendin e sulmuesit. Megjithatë, kur Muriqi është i gatshëm fizikisht, formacioni startues i Franco Fodas vështirë se mund të mendohet pa të.